२५ हजार ‘पादुकांना’ अल्प विश्रांती; बुलढाण्यातील अनोखे ‘अनवाणी व्रत’

अंगावर भारी किंमतीची जीन्स, टी शर्ट किंवा आधुनिक फॅशन चा शर्ट, जाकीट, डोळ्यावर गॉगल, केसांचे वेगवेगळे ‘डिझाईन’ , असा जबर थाट पण पायात महागडा बूटच काय स्लीपर देखील नाही. युवतींचा ही असाच ‘लुक’ असतो. भारी महागडे कपडे पण पाय मात्र अनवाणी, यात महिलांचे प्रमाणही मोठे आहे. अंगावर अगदी जॉर्जेट, पैठणी, ‘स्लीवलेस’ असलेली महिलाही बिना पादत्राणे असेच चित्र. नवरात्रोत्सव मध्ये देवीवरील श्रद्धा पोटी हे अनवाणी व्रत पाळले जाते. बुलढाण्यात ही अलिखित परंपरा कधी सुरू झाली हे नक्की सांगता येणार नाही.

हेही वाचा >>> महिलांनी तोकडे कपडे घालणे अश्लीलता नाही, उच्च न्यायालय असे का म्हणाले?

मात्र किमान २५ वर्षांपासून नवरात्रीत अनवाणी व्रत पाळले जात आहे. जग झपाट्याने बदलत आहे, फॅशन ओंगळवणी झाली पण हे व्रत पाळणाऱ्यांचे प्रमाण वाढतच आहे. यंदा किमान २५ हजार बुलढाणेकर याचे पालन करीत असल्याचा अंदाज आहे. याविषयी विचारणा केल्यावर बहुतेक ‘साधक’बोलण्याचे टाळतात. काही जण ‘मातेवरील श्रद्धेपोटी करतोय’, असे एका वाक्यात उत्तर देतात. माध्यमाशी संबधित, रणजितसिंह राजपूत यांनी याचे मार्मिक विवेचन केले असून यामुळे श्रद्धा वृद्धिंगत होते, मानसिक समाधान मिळते, तसेच यामुळे ‘पाय जमिनीवर’ राहतात असे ते म्हणाले. अगदी थाटात फिरणाऱ्या नवविवाहित राजू पाटील व त्यांच्या पत्नीने वेगळ्या शब्दात पण हाच अर्थ सांगितला. एका युवकाने नाव न सांगता श्रद्धा आणि थोडाफार ‘ऍक्यु पंक्चर थेरेपी’ चा लाभ होतो असे सांगितले.