श्रावण सोमवार : बेल म्हणतेय माझ्यासाठी घातवार..

वर्धा : महादेव भक्त मंडळींनो, मी बेलाचे झाड. आज श्रावण सोमवार म्हणून कालपासून मला ओरबाडणे सुरू झाले. भक्ता, माझी पाच पाने वाहल्याने पूजा पूर्ण होत नाही का. प्रत्येकाने १११ पाने वाहली पाहिजेच का ? मी एक जीवच असल्याचे भान ठेवल्यास सृष्टीस किती आनंद होईल. तुम्ही किती पाने वाहू, किती नाही असे करीत माझ्या फांद्याच तोडतात. जणू माझे हात पायच छाटतात. काही तर कुऱ्हाडीने घावच घालतात. पण अश्याने माझ्या कुळाचा नायनाट होत आहे, हे कुणी का लक्षात घेत नाही. सतत तोड केल्याने मला फुलच येणार नाही. म्हणून मग फळपण लागणार नाही.