बुलढाणा: बारावी पेपरफुटीप्रकरणी सहा जण ताब्यात; मुख्य सूत्रधाराचा कसोशीने शोध

इयत्ता बारावीच्या गणित विषयाच्या पेपरफुटीचा तपास साखरखेर्डा (ता. सिंदखेडराजा) पोलिसांकडे वर्ग करण्यात आला आहे. आज पोलिसांनी सहा जणांना ताब्यात घेतले असून मुख्य सूत्रधाराचा कसोशीने शोध घेण्यात येत आहे.३ मार्च रोजी सिंदखेडराजा तालुक्यातील राजेगांव येथील भास्करराव शिंगणे कला महाविद्यालयावरील परिक्षा केंद्रावर बारावीचा गणिताचा पेपर सुरू होण्यापूर्वीच समाज माध्यमावर सार्वत्रिक झाला होता. शुक्रवारी सिंदखेडराजा पोलिसांकडे पंचायत समितीचे गट शिक्षणाधिकारी रंगनाथ गावडे यांनी तक्रार दाखल केली होती. मात्र, राजेगाव येथील वादग्रस्त केंद्रावरून पेपर सार्वत्रिक झाल्याचे निष्पन्न झाल्याने गुन्हा आज ४ मार्चला साखर खेर्डा पोलिसांकडे वर्ग करण्यात आला.