नागपूर : आंतरराष्ट्रीय बुकी सोंटू ऊर्फ अनंत जैनला शनिवारी न्यायदंडाधिकारी न्यायायलाने शुक्रवारपर्यंत (२७ ऑक्टोबर) पोलीस कोठडीत ठेवण्याचे आदेश दिलेत. बुकी सोंटू जैनची नव्याने चौकशी करण्यात येणार आहे.
शनिवारी सोंटूची पोलीस कोठडी समाप्त झाल्यामुळे गुन्हे शाखेने त्याला न्यायालयात हजर केले. या बनावट ऑनलाईन गेमींग अ‍ॅप फसवणूक प्रकरणाचा चौकशी तपास करण्यासाठी पोलिसांनी न्यायालयाला ९ दिवसांच्या पोलीस कोठडीची विनंती केली होती. परंतु न्यायालयाने सोंटूला २७ ऑक्टोबरपर्यंत पोलीस कोठडी दिली. आता पुन्हा २७ ऑक्टोबरपर्यंत कोठडी मिळाल्याने पोलीस सोंटूची नव्या पद्धतीने कसून चौकशी करणार आहे. १६ ऑक्टोबरला दुपारी प्रथम श्रेणी न्यायदंडाधिकारी उके यांच्यासमक्ष सोंटूने आत्मसर्मपण केले होते.
हेही वाचा – वर्धा : किडनी प्रत्यारोपणात अव्वल, ‘या’ रुग्णालयाची शतकी कामगिरी
सोंटूला मदत करणारे आरोपी बँक व्यवस्थापक अंकेश खंडेलवाल आणि डॉ. गौरव बग्गा या दोघांनाही अटक करण्यात आली. त्यांना न्यायालयाने ८ दिवस पोलीस कोठडीत ठेवण्याचे आदेश दिले. हे दोघेही सोंटूचे मित्र असून त्यांनी सोंटूच्या बँक लॉकरमधून सोने आणि पैसे काढले होते. ते सर्व डॉ. बग्गा याची पत्नी डॉ. गरीमा बग्गा हिच्या नावाचे नव्याने उघडलेल्या बँक लॉकरमध्ये ठेवले होते. हा उलगडा सोंटूने पोलिसांकडे जमा केलेल्या मोबाईलमधून झाला आहे. पोलिसांनी डॉ. गौरव बग्गासह त्याची पत्नी डॉ. गरीमा बग्गा, सोंटूची आई कुसुमदेवी जैन, भाऊ मोंटू जैन, वहिणी श्रद्धा जैन यांच्याविरुद्ध गिट्टीखदान पोलीस ठाण्यात नव्याने गुन्हा दाखल केला आहे. तसेच सोंटूचा मित्र बंटी कोठारी यालाही पोलिसांनी ताब्यात घेतले आहे.
