वादळी पावसाचा फायदा घेत नागपूरच्या अजनी वसाहतीतील शेकडो वृक्षांवर कुऱ्हाड; महापालिकेकडून केवळ नोटीस बजावण्याचे सोपस्कार

अजनी रेल्वे स्थानकाच्या विकासासाठी आणि वाहनतळासाठी, रेल्वे भूविकास प्राधिकरणाने अजनी रेल्वे वसाहतीतील शेकडो झाडे नागपूर महापालिकेच्या उद्यान विभागाची परवानगी न घेता तोडल्याचा आरोप आहे. इंटर मॉडेल स्थानकामुळे आधीच ही वसाहत चर्चेत आली आहे. या प्रकल्पासाठी हजारो झाडे तोडली जाणार असल्याने वृक्षप्रेमींनी याविरोधात आंदोलन केले. आता स्थानक विस्तारीकरण प्रकल्पामुळे अजनी वसाहत चर्चेत आली आहे.

हेही वाचा – संजय राऊत यांच्या सरकार पडण्याच्या भविष्यवाणीवर छगन भुजबळांची प्रतिक्रिया; म्हणाले, “सरकारला धोका नाही, मात्र..”

रेल्वे रुळाजवळील वसाहतीत मोठ्या प्रमाणात वृक्षतोड झाल्याची माहिती मिळताच महापालिकेचे उद्यान अधीक्षक अमोल चोरपगार यांनी घटनास्थळी धाव घेतली. उद्यान विभागाची परवानगी न घेता शेकडो झाडे तोडल्याचे त्यांना आढळले. गुरुवारी शहरात मोठ्या प्रमाणात वादळीवाऱ्यासह पावसाने थैमान घातले. त्यामुळे मोठमोडी शेकडो झाडे उन्मळून पडली. तर काही झाडांच्या फांद्या तुटून पडल्या. त्याचवेळी दुसऱ्या दिवशी अजनी वसाहतीतील या वृक्षतोडीचे प्रकरणदेखील समोर आले. त्यामुळे या घटनेचा फायदा घेऊनच तर ही वृक्षतोड करण्यात आली नसावी ना, असाही अंदाज व्यक्त केला जात आहे. एवढ्या मोठ्या प्रमाणात विनापरवानगी वृक्षतोड होणे ही बाब धक्कादायक आहे. त्यासाठी केवळ संबंधित यंत्रणेला नोटीस बजावून होणार नाही तर अवैध वृक्षतोड अधिनियमानुसार कठोर कारवाई व्हायला हवी, असे वृक्षप्रेमी कुणाल मौर्या म्हणाले. यावेळी त्यांनी अजनी वसाहतीतील आधीचे आणि नंतरचे छायाचित्र ‘लोकसत्ता’सोबत सामायिक केले.