वर्धा : देशभरात झालेल्या आत्महत्या चिंतेचा विषय आहे. त्यात विद्यार्थ्यांच्या आत्महत्या चिंतेचा विषय असल्याचे आकडेवारीतून पुढे आले आहे. प्रामुख्याने स्पर्धा परीक्षा देणाऱ्या तसेच शालेय मुलांच्या आत्महत्या अधिक असल्याचे आढळून आले आहे. त्याची दखल घेत केंद्रीय शिक्षण मंत्रालयाने काही शिफारशी केल्या आहेत.
समवयस्क मुलांशी तुलना टाळावी, शाळा स्तरावर वेलनेस टीमची स्थापना, स्वतःची हानी करण्याची मानसिकता झालेल्या विद्यार्थ्यांना ओळखून त्यांचे समुपदेशन करण्याचे सुचविण्यात आले आहे. तसेच अपयश कायमचे समजून व शैक्षणिक कामगिरी हेच यशाचे एकमेव गमक समजण्याची मानसिकता बदलण्याची गरज आहे. शालेय वास्तूत उदास अंधारमय वातावरण असलेल्या भागात प्रकाशव्यवस्था करणे, बागबगीचे आणि अन्य परिसर स्वच्छ ठेवण्याची सूचना आहे. मुख्याध्यापकांनी स्कूल वेलनेस टीममध्ये समुपदेशक, शिक्षक, आरोग्य तज्ञ, नर्स व अनुषंगिक वर्ग ठेवून धोक्याची चिन्हे दिसणाऱ्या विद्यार्थ्यावर लक्ष ठेवून उपाय करण्याची शिफारस झाली आहे.
