महेश बोकडे
नागपूर: राज्यात गेल्या तेरा दिवसांत करोनाचे संक्रमण वाढल्याने सक्रिय करोनाग्रस्तांची संख्या दुप्पट झाली आहे. सार्वजनिक आरोग्य विभागाच्या एकात्मिक रोग सर्व्हेक्षण कार्यक्रमाच्या अहवालानुसार, राज्यात २८ मार्चला २ हजार ३४३ सक्रिय करोनाग्रस्त होते. ही संख्या ९ एप्रिल २०२३ रोजी वाढून ४ हजार ५८७ वर पोहचली.
राज्यात मध्यंतरी करोना नियंत्रणात आला होता. परंतु, आता मुंबई (१,४३४ रुग्ण), ठाणे (८२० रुग्ण), पुणे (७४७ रुग्ण), नागपूर (३२८ रुग्ण), रायगड (२५१ रुग्ण) येथे करोनाचे रुग्ण वाढताना दिसत आहेत. इतरही भागात कमी-अधिक रुग्णवाढ सुरू आहे. राज्यातील ९ एप्रिलची सक्रिय करोनाग्रस्तांची संख्या ४ हजार ५८७ रुग्णांवर पोहचली आहे.
रत्नागिरी, नंदूरबार, धुळे, परभणी येथे २८ मार्चच्या तुलनेत ९ एप्रिललाही सारख्याच संख्येत रुग्ण आढळले. कोल्हापूर, अहमदनगर, जालना, भंडारा येथे मात्र २८ मार्चच्या तुलनेत ९ एप्रिलला सक्रिय रुग्णसंख्या कमी झालेली दिसत आहे. या वृत्ताला आरोग्य विभागातील अधिकाऱ्यांनी दुजोरा दिला.
रुग्णसंख्या कमी असलेल्या जिल्ह्यांची स्थिती
जिल्हा २८ मार्च २०२३ ९ एप्रिल २०२३
कोल्हापूर ३८ रुग्ण ३१ रुग्ण
अहमदनगर ४७ रुग्ण ३३ रुग्ण
जालना ०४ रुग्ण ०३ रुग्ण
भंडारा ०५ रुग्ण ०० रुग्ण
रत्नागिरी २२ रुग्ण २२ रुग्ण
नंदूरबार ०४ रुग्ण ०४ रुग्ण
धुळे ०६ रुग्ण ०६ रुग्ण
परभणी ०० रुग्ण ०० रुग्ण
