यवतमाळ : डाळ साठवणुकीची मोठी कोठी अंगावर कोसळल्याने त्याखाली दबून तीन मजुरांचा मृत्यू झाला. ही धक्कादायक घटना शहरातील लोहारा एमआयडीसी परिसरात असलेल्या मनोरमा जैन दालमीलमध्ये आज मंगळवारी सायंकाळी ४.३० वाजताच्या सुमारास घडली. मृतांमध्ये बापलेकाचा समावेश आहे. भावेश कडवे, रा. वर्धा असे मृतक सुपरवायझरचे तर मुकेश सुरेश काजले आणि सुरेश काजले रा. रायपूर खंडवा (मध्यप्रदेश) अशी मृत मजूर बापलेकांची नावे आहेत. दिलीप आणि करणसिंग धुर्वे अशी गंभीर जखमी मजूरांची नावे आहे.
या प्रकरणी पोलीस सुत्रांकडून मिळालेल्या माहितीनूसार, शहरातील लोहारा एमआयडीसी परिसरात मनोरमा जैन दाल मिल आहे. या दामलीवर अनेक मजूर कार्यरत आहे. मंगळवारी नेहमीप्रमाणे कामकाज सुरू असतांना डाळ साठवणुकीची अगडबंब कोठी अचानक सुपरवायझर भावेश कडवे आणि मजूर बापलेक सुरेश कडवे, मुकेश कडवे यांच्या अंगावर पडली. त्यामुळे या स्टोरेजखाली दबून तिघांचाही मृत्यू झाला. या घटनेत दिलीप आणि करणसिंग धुर्वे हे दोघे मजूर गंभीर जखमी झाले असून त्यांच्यावर शासकीय रूग्णालयात उपचार सुरू आहे.
या घटनेने शहरात एकच खळबळ उडाली. घटनेचे गांभीर्य लक्षात अपर पोलीस अधीक्षक पियूष जगताप, उपविभागीय पोलीस अधिकारी दिनेश बैसाणे, लोहारा ठाणेदार यशोधरा मुनेश्वर यांच्यासह अधिकारी, कर्मचाऱ्यांनी घटनास्थळी धाव घेतली. त्यानंतर मलब्याखाली दबलेल्या मजुरांचे मृतदेह नागरिकांच्या मदतीने बाहेर काढण्यात आले. दरम्यान घटनास्थळाचा पंचनामा करून तिन्ही मृतदेह उत्तरीय तपासणीकरीता शासकीय रूग्णालयात पाठविण्यात आले आहे. वृत्तलिहीपर्यंत या प्रकरणी लोहारा पोलीस ठाण्यात कुठल्याही प्रकारचा गुन्हा नोंद झालेला नव्हता. याबाबतचा तपास लोहारा पोलीस करीत आहे.
या घटनेनंतर लोहारा परिसरातील नागरिकांनी घटनास्थळी एकच गर्दी केली. अनेक मजुरांचे नातेवाईक आपले कोणी या घटनेत जखमी किंवा मृत झाले नाही ना याची कात्रजमा करत होते घटनास्थळी पोलिसांनी बंदोबस्त ठेवला. जखमींना येथील शासकीय वैद्यकीय महाविद्यालयात दाखल करण्यात आले. तेथेही नागरिकांनी गर्दी केली. या दाल मिलमध्ये स्थानिक मजुरांशिवाय परप्रांतीय आणि इतर जिल्ह्यातील मजूरही मोठ्या प्रमाणात काम करतात. ही घटना नेमकी कोणाच्या चुकीमुळे घडली की, हा केवळ अपघात होता याबाबत पोलीस तपास करत आहेत.
