बुलढाणा : रेतीचे अवैध उत्खनन, वाहतुकीचा केंद्रबिंदू ठरलेल्या खडकपूर्णा धरण परिसरात प्रशासनाच्या नाकावर टिच्चून रेती माफियांचा गोरखधंदा राजरोसपणे सुरु आहे. रेती माफियाचे मनोधैर्य कमालीचे वाढले आहे. काल मंगळवारी याचा भीषण प्रत्यय आला. रात्री दहा वाजताच्या सुमारास रेतीची अवैध वाहतूक करणाऱ्या टिप्परने एका तलाठ्याला सुसाट वेगाने अक्षरशः उडविले. या जोरदार धडकेमुळे तलाठी गंभीर जखमी झाला असून त्याची प्रकृती अत्यवस्थ आहे. त्याला जालना येथे उपचारासाठी हलविण्यात आले आहे.
देऊळगाव राजा तालुक्यातील देऊळगाव मही येथे ही घटना घडली. परमेश्वर दामोधर बुरकुल असे गंभीर जखमी कर्मचाऱ्याचे नाव आहे. घटनेचा विस्तृत तपशील मिळाला नसून प्राथमिक माहितीनुसार, तलाठी परमेश्वर बुरकुल हे दुचाकीने देऊळगावराजाकडे जात होते. दरम्यान, मही गावाजवळ त्यांना अज्ञात टिप्पर चालकाने संभाव्य कारवाईच्या भीतीने सुसाट वेगात जोरदार धडक दिली. त्यामध्ये बुरकूल हे गंभीर जखमी झाले. त्यांना प्रारंभी तातडीने नाजिकच्या देऊळगाव मही येथील शासकीय ग्रामीण रुग्णालयात दाखल करण्यात आले. ग्रामीण रुग्णालयात त्यांच्यावर प्राथमिक उपचार करण्यात आले. मात्र त्यांच्या जखमा गंभीर स्वरूपाच्या असल्याने आणि त्यांची प्रकृती गंभीर असल्याने त्यांना पुढील उपचारासाठी जालना येथे हलविण्यात आले.
हेही वाचा – रस्ते, उड्डाणपुलांमुळे प्रसिद्ध नागपुरात एक रस्ता असाही आहे जो २५ वर्षापासून…
दरम्यान घटनेची माहिती मिळताच देऊळगावराजा पोलीस ठाण्याचे अधिकारी, कर्मचारी यांचे पथक घटनास्थळी दाखल झाले. वरिष्ठ पोलीस अधिकाऱ्यांना घटनेची माहिती देऊन देऊळगाव राजा पोलिसांनी सुसाट वेगाने पसार झालेल्या टिप्परचा शोध सुरू केला होता. आजूबाजूच्या पोलीस ठाण्यांना याची माहिती देऊन नाकाबंदी करण्यात आली. मात्र कर्मचाऱ्यांस गंभीर जखमी करणाऱ्या वाहनाचा शोध लागू शकला नाही. प्रकरणी देऊळगाव राजा पोलिसांनी अज्ञात टिप्पर चालकाविरोधात विविध कलमानुसार गुन्हे दाखल केले आहेत.
हेही वाचा – नागपूर, पुणे, मुंबईकरिता स्लीपर वंदे भारत एक्स्प्रेस
या घटनेमुळे वाळू माफियांच्या मुसक्या आवळण्यासाठी जिल्हा यंत्रणेने युद्ध पातळीवर काम कण्याची गरज निर्माण झाली आहे. जिल्हाधिकारी किरण पाटील यांनी दोन दिवसांपूर्वी पोलीस विभाग, महसूल खाते, प्रादेशिक परिवहन विभागाची संयुक्त बैठक घेतली होती. त्यात संयुक्त कारवाई करण्याचे सुतोवाच करण्यात आले. मात्र या घटनेने रेती माफियाची मुजोरी, मनोधैर्य किती वाढले हे दिसून येते.
