बुलढाणा : मृत्यूचा सापळा ठरलेल्या समृद्धी महामार्गावरील अपघाताची मालिका कायम आहे. तांत्रिक उणिवा आणि चालकांची हयगय यामुळे समृद्धी महामार्गावरील अपघाताचे प्रमाण वाढतच चालले आहे. मंगळवारी रात्री उशिरा समृद्धी महामार्गावर अतिवेगाने दोन बळी घेतले. या दुर्घटनेत दाम्पत्याचा मृत्यू झाला, तर वाहन चालक मुलगा गंभीर जखमी झाला असून, मृत्यूशी झुंज देत आहे. जखमीवर सिंदखेडराजा येथे उपचार सुरू आहेत.
मंगळवारी रात्री उशिरा बुलढाणा जिल्ह्यातून जाणाऱ्या समृद्धी महामार्गावर दुसरबीडजवळील नागपूर कॉरिडॉर येथे पुण्याहून नागपूरकडे जाणारी भरधाव क्रेटा कार समोरील वाहनावर धडकली. ही धडक एवढी भीषण होती की त्यात एकाच कुटुंबातील दोघांचा घटनास्थळीच मृत्यू झाला. अमित पाध्ये आणि इश्वरी पाध्ये अशी मृतांची नावे आहेत. या दुर्घटनेत त्यांचा मुलगा आशीष पाध्ये (चालक) गंभीर जखमी झाला. पाध्ये कुटुंब पुण्याहून नागपूरकडे जात होते.
