उपमुख्यमंत्री एकनाथ शिंदेंना धमकीप्रकरणाचे बुलढाणा कनेक्शन, पोलिसांनी दोन युवकांना…

गोरेगाव (मुंबई ) पोलिसांनी बुलढाणा जिल्ह्यातील देऊळगाव मही येथून दोन युवकांना आज शुक्रवार, २१ फेब्रुवारी रोजी सकाळी ताब्यात घेतले. त्यांची मुंबईत कसून चौकशी करण्यात येत आहे. यामुळे देऊळगाव माही गावासह बुलढाणा जिल्ह्यात आणि राज्याच्या राजकीय वर्तुळात एकच खळबळ उडाली आहे. ताब्यात घेतलेले तरुण नात्याने ‘आतेभाऊ-मामे भाऊ’ असल्याचे सांगितले जाते.

या दोघांनी उपमुख्यमंत्री एकनाथ शिंदे यांचे वाहन बॉम्बने उडवून देऊ, अशी धमकी दिल्याची माहिती २० फेब्रुवारीला मुंबईतील काही पोलीस ठाण्यांना मिळाली होती. याप्रकरणी गोरेगाव (मुंबई) पोलीस ठाण्यात भारतीय न्याय संहितेच्या  विविध कलमान्वये गुन्हा दाखल करण्यात आला होता.

पोलिसांचे म्हणणे काय?

मंगेश अच्युतराव वायाळ (३५), अभय गजानन शिंगणे (२२) दोघेही रा. देऊळगाव मही, ता. देऊळगाव राजा, जि. बुलढाणा, अशी ताब्यात घेण्यात आलेल्यांची नावे आहेत. मंगेश हा ट्रक चालक असून, अभयचे मोबाईल शॉप असल्याची माहिती समोर आली आहे. प्राथमिक तपासानुसार, या दोघांनी आपसातील वादातून एकमेकांवर कुरघोडी करण्याच्या उद्देशाने हे कृत्य केले असावे, असा पोलिसांचा प्राथमिक संशय आहे. तथापि, या प्रकरणाचा सखोल तपास करण्यात येत आहे. या दोघांची मुंबईत बारकाईने चौकशी करण्यात येत असून धमकी देण्या मागील त्यांचा हेतू काय, त्याचे कारण काय याची माहिती घेण्यात येत आहे. या  चौकशीचा तपशील मिळाला नाही.

मुंबईत चौकशी सुरू

गोरेगाव पोलिसांनी दोघांना ताब्यात घेऊन मुंबईला नेले. तेथे त्यांची चौकशी सुरू आहे. सार्वजनिक सेवकाला त्याच्या कर्तव्यापासून परावृत्त करण्यासाठी धमकी दिल्याच्या आरोपाखाली ही कारवाई करण्यात आली आहे.

मंगेशच्या मोबाईलचा वापर

या प्रकरणात अभयने मंगेशच्या मोबाईलचा वापर केल्याचे पोलीस तपासात उघड झाले आहे. मात्र, हा मुद्दा संवेदनशील असल्याने पुढील तपासात पोलिसांची भूमिका काय असेल, याकडे लक्ष लागले आहे.