Video : उमरेड-कऱ्हाडलाच्या “एफ-२” वाघिणीच्या बछड्यांची मस्ती कॅमेऱ्यात कैद

आता ‘एफ-२’ नावाची वाघीणसुद्धा तिच्या पाच बछड्यांसह पर्यटकांना आकर्षित करत आहे. असाच एक या वाघिणीचा तिच्या बछड्यासह मस्ती करतानाचा क्षण वन्यजीव छायाचित्रकार इंद्रजित मडावी यांनी चित्रित केलाय.

उमरेड कऱ्हांडला अभयारण्यातील गोठणगाव गेट जवळ सध्या एक वाघीण आणि तिचे पाच बछडे पर्यटकांना भुरळ घालत आहेत. “एफ-२” नावाच्या या वाघिणीसह तिच्या पाच बछड्यांचे उमरेड कऱ्हांडला अभयारण्यात पर्यटकांना दर्शन होत असल्याने पर्यटक सुखावले आहेत. “एफ-२” वाघीण ही “फेअरी” वाघिणीची मुलगी आहे. “एन-४” आणि “पाटील” नावाच्या दोन वाघासोबत तिचा वावर होता.

सध्या या परिसरात “जे-मार्क” नावाच्या वाघाचा दबदबा आहे. नागपूरच नाही तर अवघ्या महाराष्ट्र आणि महाराष्ट्राबाहेरील वन्यजीवप्रेमी पर्यटकांची पावले नागपूर जिल्ह्यातील उमरेड कऱ्हांडलाच्या जंगलाकडे वळली आहेत. या जंगलात वाघाचेच नाही तर संपूर्ण कुटुंबाचे हमखास दर्शन पर्यटकांना होत आहे. त्यामुळे पर्यटकांची संख्या देखील वाढीस लागली आहे.

वाघीण आणि तिच्या बचड्यांना पाहण्यासाठी पर्यटकांमध्ये चुरस लागल्याने अक्षरशः त्या संपूर्ण कुटुंबाची वाट अडवण्याचा प्रकार दरम्यानच्या काळात झाला होता. ज्यामुळे पर्यटक मार्गदर्शक, वाहनचालकच नव्हे तर पर्यटकसुद्धा अडचणीत आले होते. वाहनचालक आणि पर्यटक मार्गदर्शक यांचे काही कालावधीसाठी निलंबन तर पर्यटकांना अभयारण्यात बंदी घालण्यात आली होती. त्यामुळे थोडीफार का होईना शिस्त लागली आहे. मात्र, वाघाच्या कुटुंब दर्शनासाठी अभयारण्य प्रशासनाच्या मर्जीतील रिसॉर्टचालकांकडून आगाऊ बुकिंग देखील करण्यात आले आहे. त्यामुळे सर्वसामान्य पर्यटकांना वाघाचे हे सहकुटुंब व्याघ्रदर्शन कठीण झाले आहे.