वंचितची शिवसेनेसोबत युती, बुलढाण्यात मात्र राष्ट्रवादीसोबत जुंपली! माजी मंत्री राजेंद्र शिंगणेंविरोधात वंचित उमेदवाराची तक्रार

अमरावती विभाग पदवीधर मतदारसंघातील महाविकास आघाडीचे उमेदवार धीरज लिंगाडे यांच्या प्रचारार्थ स्थानिक गर्दे वाचनालय सभागृहात सोमवारी (दि. २४) संध्याकाळी उशिरा आघाडीची बैठक पार पडली. या बैठकीनंतर माजी मंत्री आणि राष्ट्रवादीचे नेते आ. राजेंद्र शिंगणे यांनी मोजक्या माध्यम प्रतिनिधींशी चर्चा केली. ठाकरे गट आणि वंचित बहुजन आघाडी यांची युती झाल्यानंतर अमरावती पदवीधर मतदारसंघाचे वंचित बहुजन आघाडीचे उमेदवार अनिल अमलकार यांनी महाविकास आघाडीचे उमेदवार धीरज लिंगाडे यांना पाठिंबा देण्यासंदर्भात आमची बोलणी सुरू आहे, असे ते म्हणाले. लवकरच त्याला यश मिळणार असल्याचे वक्तव्यही शिंगणे यांनी केले.

हेही वाचा – “रुपयाच्या अवमूल्यनामुळेच कापसाला ८ हजारांचा भाव”, विजय जावंधियांचे पंतप्रधानांना पत्र, म्हणाले, “अमेरिकेत शेतकरी..”

हेही वाचा – खर्च मर्यादा नसल्याने ‘शिक्षक’ची निवडणूकही महागली

हे वृत्त आज सार्वत्रिक झाल्यावर अनिल अमलकार यांनी खामगाव येथे माध्यमांशी बोलताना त्यास स्पष्ट नकार दिला. एवढेच नाही तर, त्यांनी कार्यकर्त्यांसह खामगाव पोलीस ठाणे गाठून तक्रारच दाखल केली. आ. शिंगणे किंवा महाविकास आघाडीच्या कुठल्याही नेत्यांकडून वंचितच्या नेत्यांसोबत बोलणे झालेले नाही, असे त्यांनी स्पष्ट केले. आ. शिंगणे यांनी चुकीचे वक्तव्य करत मतदारांची दिशाभूल करण्याचा प्रयत्न केला आहे. हा आचारसंहितेचा भंग असून त्यांच्यावर कारवाई करावी, अशी मागणी अमलकार यांनी तक्रारीद्वारे केली आहे.