वंचितची दुसरी यादी जाहीर; उमेदवारांच्या जातीचाही उल्लेख

अकोला : वंचित बहुजन आघाडीने ११ उमेदवारांची दुसरी यादी रविवारी सायंकाळी जाहीर केली. यामध्ये उमेदवारांच्या जातीचा देखील उल्लेख केला असून विविध जातींना प्रतिनिधित्व दिले आहे. वंचितने पाहिल्या यादीत आठ मतदारसंघातील उमेदवार जाहीर केले होते. कोल्हापूर आणि नागपूर येथे काँग्रेसच्या उमेदवाराला पाठिंबा जाहीर केला. त्यानंतर वंचित आघाडीने रविवारी सायंकाळी ११ उमेदवारांची दुसरी यादी जाहीर केली. यामध्ये हिंगोलीमधून डॉ. बी. डी. चव्हाण, लातूर नरसिंहराव उदगीरकर, सोलापूर राहुल गायकवाड, माढा रमेश बारसकर, सातारा मारुती जानकर, धुळे अब्दुल रहेमान, हातकणंगले दादासाहेब पाटील, रावेर संजय ब्राह्मणे, जालना प्रभाकर बकले, उत्तर मध्य मुंबई अब्दुल खान व रत्नागिरी-सिंधुदुर्ग येथून काका जोशी यांना उमेदवारी जाहीर करण्यात आली आहे.