चंद्रपूर : राष्ट्रीय स्वयंसेवक संघाचे प्रमुख मोहन भागवत यांची हाफ पँट व पंतप्रधान नरेंद्र मोदी यांच्यावर टीका करणाऱ्या आमदार नितेश राणे यांनी आम्हाला निष्ठा शिकवू नये. त्यांनीच आतापर्यंत तीन वेळा पक्ष बदल केला आहे, अशी टीका राज्याचे विरोधी पक्षनेते विजय वडेट्टीवार यांनी येथे केली. कारागृहात जाणे पसंद करील पण भाजपात जाणार नाही, असा पुनरुच्चार पुन्हा एकदा वडेट्टीवार यांनी केला.
आमदार नितेश राणे यांनी वडेट्टीवार यांच्यावर टीका केल्यानंतर वडेट्टीवार यांनी प्रत्युत्तर दिले. नारायण राणे व त्यांच्या सुपुत्राने आतापर्यंत तीन वेळा पक्ष बदल केला आहे. मी कुठेही जाणार नाही. त्यामुळेच काँग्रेस श्रेष्ठींनी विश्वास दाखविला. काँग्रेस नेत्यांचा माझ्यावर पूर्ण विश्वास आहे, असेही वडेट्टीवार म्हणाले. नारायण राणे यांच्यासोबत मी काँग्रेस पक्षात आलो. तेव्हा राणे यांची भूमिका वेगळी होती. आता राणे यांची भूमिका वेगळी आहे. दुसऱ्याच्या मंत्री होण्याच्या वावड्या उडविण्यापेक्षा पहिल्यांदा नितेश राणे यांनी मंत्री व्हावे, असेही ते म्हणाले.
हेही वाचा – महाराष्ट्रात रेल्वेच्या सांडपाण्याची अशी होणार विल्हेवाट, वाचा…
भाजपा हा वापर करून घेणारा व फेकून देणारा पक्ष आहे, असेही वडेट्टीवार म्हणाले. भाजपा पंकजा मुंडे यांचेही तेच करत आहे. त्यामुळेच त्यांच्या साखर कारखान्यावर कारवाई झाली, असेही वडेट्टीवार म्हणाले.
