नोटांचा चुरा भरलेला ट्रक पेटला, तर्कवितर्क सुरू

विधानसभा निवडणुकीची रणधुमाळी सुरू असताना ठिकठिकाणी पोलिसांच्या तपासणीत मोठ्या प्रमाणावर रोकड पकडली जात आहे. १६ चाकांचा ट्रक (यूपी १२ सिटी ५३२७) हैदराबाद येथून उत्तरप्रदेश-मुजफ्फरनगरच्या दिशेने जात होता. या ट्रकमध्ये विविध प्रकारच्या नोटांचा तुकड्यांचा कचरा (स्क्रॅप) होता. वर्धा जिल्ह्यातील कांढळी गावाजवळून ट्रक जात असताना शॉर्टसर्किटने या ट्रकला आग लागली. त्यामुळे आतील नोटांच्या कचरा जळून खाक झाला. दरम्यान, अग्नीशमन दलाच्या वाहनांनी आग विझविण्याचा प्रयत्न केला. रिझर्व्ह बँकेने अलीकडेच या स्क्रॅप मालाचा लिलाव केला होता. त्यानुसार, हा माल नेला जात होता. वर्धा जिल्ह्यातील सिंदी पोलीस यासंदर्भात अधिक तपास करीत आहेत. ट्रकचालक जसवंतसिंह त्रिलोकसिंह (४५, मेरठ-उत्तरप्रदेश) आणि सहकारी भोपाळ दत्ताराम या दोघांनाही पोलिसांनी चौकशीसाठी ताब्यात घेतले होते. त्यांनी भारतीय चलनी नोटांचा कचरा असल्याचे पोलिसांना सांगितले.

हेही वाचा – या अपक्ष उमेदवाराला निवडणुकीसाठी अनेक सेवानिवृत्त कर्मचाऱ्यांनी दिली एक महिन्याची पेन्शन

सध्या विधानसभा निवडणुकीची धामधूम सुरु आहे. त्यातही राज्यभर लाखो रुपये निवडणूक अधिकाऱ्यांच्या पथकांकडून जप्त केले जात आहेत. मतदारांना आमिष दाखवून किंवा पैसे देऊन मत मिळविण्याचा प्रयत्न होऊ नये म्हणून पोलीस आणि जिल्हा प्रशासन सज्ज झाले आहे. त्यातच ट्रकभर नोटा असलेल्या ट्रकचा अपघात झाला आणि ट्रकमधील नोटांना आग लागल्याची अफवा पसरली. त्यामुळे बरबटी-कांढळीसह अन्य आजुबाजूंच्या गावाजवळील नागरिकांनी अपघातस्थळावर एकच गर्दी केली. मात्र, जळालेल्या नोटा नसून नोटांचा कचरा असल्याचे लक्षात आल्यानंतर अनेकांचा भ्रमनिरास झाला. त्यामुळे अनेक जण आल्यापावली परत गेले.

ह

हेही वाचा – काँग्रेसची सध्याची अवस्था ‘चाची ४२०’ प्रमाणे, मुनगंटीवार यांची टीका

भारतीय चलनातील नोटांचा कचरा वाहून नेणाऱ्या ट्रकला आग लागल्यानंतर अनेकांनी आपापली वाहने थांबवून अपघात बघण्यासाठी गर्दी केली. काहींनी ट्रकच्या आजुबाजूला पडलेल्या नोटांचा चुरा जमा केला. तर ट्रक रस्त्याच्या मधोमध असल्यामुळे रस्त्यावरील वाहतूक ठप्प झाली. तासाभरानंतर हा रस्ता सुरळीत झाला.