नागपूर : बाळासाहेब ठाकरे गोरेवाडा आंतरराष्ट्रीय प्राणी उद्यानाच्या भविष्यातील विस्तारासाठी आवश्यक पाण्याचे नियोजन करण्यास मंजुरी तसेच चंद्रपूर येथे प्रस्तावित आंतरराष्ट्रीय प्राणी उद्यानाच्या निर्मीतीसाठी सल्लागार नेमण्याच्या प्रक्रीयेला गती देण्याचे निर्देश वन मंत्री सुधीर मुनगंटीवार यांनी गुरुवारी येथे दिले.
हेही वाचा >>> ताडोबा बफरच्या जंगलात फिरणाऱ्यांकडून वनपरिक्षेत्र अधिकाऱ्यास शिवीगाळ
महाराष्ट्र वनविकास महामंडळाच्या संचालक मंडळाची बैठक वन मंत्री तथा महामंडळाचे अध्यक्ष मुनगंटीवार यांच्या अध्यक्षतेखाली येथील हिंगणा रोडवर स्थित महामंडळाच्या मुख्यालयात पार पडली. वन विभागाचे प्रधान सचिव बी.वेणुगोपाल रेड्डी (दूरदृष्य प्रणाली द्वारे), प्रधान मुख्य वनसंरक्षक डॉ. वाय. एल. पी. राव, महामंडळाचे व्यवस्थापकीय संचालक विकास गुप्ता, मुख्य महाव्यवस्थापक संजीव गौड, कंपनी सचिव सौरभ सिंह उपस्थित होते. गोरेवाडा प्रकल्पांतर्गत भविष्यात सुरु करण्यात येणाऱ्या आफ्रिकन सफारी, नाईट सफारी, गोंडवाना संग्रहालय आदी प्रकल्पांच्या संचलनासाठी पाण्याच्या व्यवस्थेचे नियोजन नागपूर महानगरपालिकेमार्फत तसेच स्वत: महामंडळाने पाईपलाईनद्वारे करण्यास मुनगंटीवार यांनी मान्यता दिली. गोरेवाडाच्या धर्तीवर चंद्रपूर येथे प्रस्तावित प्राणी उद्यानाच्या निर्मीतीसाठी महामंडळाला सल्लागार नेमण्याकरिता निविदा काढण्याची सूचना करण्यात आली होती. त्यानुसार सदर प्रस्तावास शासनाकडून मंजुरीसाठी पाठपुरावा करण्याचे निर्देश मुनगंटीवार यांनी दिले.
