नागपूर : मोकाट कुत्रा अचानक दुचाकीसमोर येण्याचं निमित्त झालं अन क्षणात होत्याचं नव्हतं झालं…

ही घटना अंबाझरी पोलीस ठाण्याच्या हद्दीत रविवारी दुपारी ५ वाजताच्या सुमारास संजय नगर, पांढराबोडी वस्तीजवळ, अंबाझरी बायपास रोडवर घडली. मोहित मोहन निंबाळकर (३६, रा. टॉप अ‍ॅण्ड टाऊन शाळेजवळ, प्रतापनगर) हे त्यांची आई अमीता निंबाळकर यांना घेऊन शेतीच्या कामाकरीता झिल्पी गाव येथे गेले होते. तेथून ते दुचाकीने घरी परतत होते. अंबाझरी हद्दीतील संजय नगर, पांढराबोडी वस्तीजवळ, अंबाझरी बायपास रोडवर अचानक त्यांच्या दुचाकीसमोर कुत्रा आडवा आला. त्याला वाचविण्याच्या प्रयत्नात ते दोघेही दुचाकीवरून खाली पडले. यात मोहित निंबाळकर यांना किरकोळ मार लागला, पण त्यांच्या आईच्या डोक्याच्या मागे मार लागल्याने त्या बेशुद्ध झाल्या. त्यांना उपचाराकरीता रुग्णालयात दाखल करण्यात आले.

हेही वाचा – नागपूर : भरधाव कारची दुचाकीला धडक, युवक उड्डाण पुलावरून खाली पडला

हेही वाचा – “शिंदे, फडणवीस आणि पवार या त्रिकुटाला घरी बसवा,” विद्यार्थ्यांचा संताप; अजित पवार असे काय बोलले की…

सोमवारी सकाळी ७ वाजताच्या सुमारास उपचारादरम्यान त्यांचा मृत्यू झाला. या प्रकरणी फिर्यादी मोहित निंबाळकर यांनी दिलेल्या सुचनेवरून अंबाझरी पोलिसांनी अकस्मात मृत्यूची नोंद करून तपास सुरू केला आहे.