या ‘ईडी’ सरकारचे हे चाललंय काय? यशोमती ठाकूर संतापल्‍या; नाफेडचा हरभरा खरेदी बंदचा आदेश

‘नाफेड’च्‍या वतीने हरभरा खरेदी सुरू झाली, तेव्‍हा शेतकऱ्यांनी नोंदणीसाठी प्रचंड गर्दी केली होती. यशोमती ठाकूर यांनी यासाठी पाठपुरावा केला होता. हरभरा खरेदीचे काम सुरू असतानाच ‘नाफेड’च्‍या कार्यकारी संचालकांनी हरभरा खरेदी बंद केल्‍याचा आदेश नुकताच तिवसा येथील खरेदी विक्री संघाला प्राप्‍त झाला. या पार्श्‍वभूमिवर यशोमती ठाकूर यांनी खरेदी विक्री संघात पोहोचून भ्रमणध्‍वनीवरून वरिष्‍ठ अधिकाऱ्यांशी चर्चा केली.

हेही वाचा – चंद्रपूर : ‘अदानी-मोदी विरोधात बोलल्यामुळे केजरीवाल यांची चौकशी’, सरकारच्या दडपशाही विरोधात ‘आप’चा सत्याग्रह

अनेक शेतकऱ्यांच्‍या घरी अजूनही हरभरा पडून आहे. ‘नाफेड’ने हरभरा खरेदी बंद केली, तर त्‍याची विक्री कुठे करायची, हा प्रश्‍न निर्माण झाला आहे. हा शेतकऱ्यांवर अन्‍याय असून सरकार इतर कामांवर कोट्यवधी रुपये खर्च करीत आहे, मात्र शेतकऱ्यांसाठी सरकारजवळ पैसा नाही. हरभरा खरेदी बंद करण्‍याचे मौखिक आदेश देऊन सरकारने हात वर केले आहेत. हा कुठला न्‍याय आहे, असा सवाल यशोमती ठाकूर यांनी केला आहे. सरकारचा हा निर्णय शेतकऱ्यांना अडचणीत आणणारा असून ‘नाफेड’ने हरभरा खरेदी केली नाही, तर तीव्र जनआंदोलन छेडले जाईल, असा इशारा यशोमती ठाकूर यांनी दिला आहे.