अमरावती : येथील गाडगेनगर पोलीस ठाण्‍याच्‍या हद्दीतील शोभानगर परिसरात एका युवकावर तिघांनी चाकूने हल्‍ला करून त्‍याची हत्‍या केल्‍याची घटना शुक्रवारी सकाळी ११ वाजताच्‍या सुमारास घडली. पूर्ववैमनस्‍यातून ही हत्‍या करण्‍यात आल्‍याचा संशय पोलिसांनी व्‍यक्‍त केला आहे. रोहित रतन पाल (१९, रा. मांडवा झोपडपट्टी) असे मृत युवकाचे नाव आहे.
रोहित पाल हा शोभा नगर परिसरातील एका पानटपरीनजीक सकाळी ११ वाजताच्‍या सुमारास मित्रासोबत बोलत उभा होता. त्‍याचवेळी तीन हल्‍लेखोर तेथे पोहचले. त्यांनी अचानकपणे रोहितवर चाकूने वार करण्‍यास सुरूवात केली. या जीवघेण्‍या हल्‍ल्‍यात रोहितचा जागीच मृत्‍यू झाला. हल्‍लेखोर लगेच पळून गेले. घटनेची माहिती मिळताच गाडगेनगर पोलिसांनी घटनास्‍थळी पोहचून तपास सुरू केला. जुन्‍या वैमनस्‍यातून रोहितची हत्‍या करण्‍यात आली असावी, असा संशय पोलिसांनी व्‍यक्‍त केली आहे. पोलिसांनी परिसरातील सीसीटीव्‍ही तपासण्‍याचे काम हाती घेतले आहे.
हेही वाचा…दक्षिण नागपूरमधील महिलांची वाढलेली मते निर्णायक
विधानसभेच्‍या निवडणुकीसाठी २० नोव्हेंबर रोजी मतदान पार पडले. शनिवारी मतमोजणी होणार आहे. त्‍यादृष्‍टीने पोलीस यंत्रणा बंदोबस्‍ताचे नियोजन करीत असतानाच शहरात पुन्‍हा एकदा युवकाच्‍या हत्‍येची घटना समोर आली आहे. गेल्‍या महिन्‍यात एकापाठोपाठ सात जणांच्‍या हत्‍येने अमरावती शहर हादरून गेले होते. त्‍यातील काही हे अल्‍पवयीन होते, तर मारेकरी देखील अल्‍पवयीन आहेत. युवकांमधील ही गुन्‍हेगारी वृत्‍ती रोखण्‍याचे आव्‍हान पोलिसांसमोर उभे ठाकले आहे.
गेल्‍या महिन्‍यात २१ तारखेला रात्री उशिरा बालगृहातून नुकत्‍याच सुटलेल्‍या १७ वर्षीय मुलाची हत्‍या करून त्‍याचा मृतदेह गडगडेश्‍वर मंदिर परिसरात फेकून देण्‍यात आला होता. ऑक्‍टोबर महिन्‍यातील हत्‍येची ही सातवी घटना असल्‍याने कायदा व सुव्‍यवस्‍थेचा मुद्दा चर्चेत आला होता. खोलापुरी गेट पोलीस ठाण्‍याच्‍या हद्दीत ही घटना घडली होती. साहिल पंजाबी असे मृत मुलाचे नाव होते.
हेही वाचा…दहा महिन्‍यांत रेल्‍वे रुळावर २ हजार ३८८ मृत्‍यू ; मध्‍य रेल्‍वेचे ‘मिशन झिरो डेथ’ काय?
साहिल पंजाबी याचा दोन ते तीन महिन्‍यांपुर्वी एका युवकासोबत वाद झाला होता. दोन्‍ही गटातील युवकांनी हा वाद मिटवण्‍यासाठी राजापेठ परिसरात एक बैठक घेतली होती. पण, त्‍यावेळीही पुन्‍हा वाद उफाळून आला आणि साहिलने एका युवकावर चाकूने वार केला होता. या प्रकरणी राजापेठ पोलिसांनी साहिल याला ताब्‍यात घेऊन बालसुधारगृहात ठेवले होते. साहिल हा बालसुधारगृहातून बाहेर पडला होता. २१ ऑक्‍टोबरला रात्री त्‍याची हत्‍या करण्‍यात आली होती
