नागपूर : मध्यवर्ती कारागृहात बंदिस्त कैद्यांना गांजा पुरविणारी टोळी यापूर्वी पकडल्या गेली होती. त्यात दोन तुरुंगरक्षकांचाही समावेश होता. मात्र, पुन्हा एकदा गांजा कारागृहात पोहचविण्याचा प्रयत्न करण्यात आला. पोलिसांच्या सतर्कतेमुळे हा प्रयत्न फसला. पोलिसांनी एका युवकाला २५ ग्रँम गांजासह न्यायालय परीसरातून अटक केली. करण विनोद पाटील (२४, बेझनबाग, जरीपटका) असे आरोपीचे नाव आहे.
हेही वाचा >>> वर्धा: मागणी असणाऱ्या ‘ या ‘ बियाण्याची आता कृषी खात्याच्या निगराणीत विक्री, प्रसंगी कंपनीवर कारवाई
करण पाटील हा कुख्यात गुन्हेगार असून त्याच्यावर हत्याकांडाचा गुन्हा दाखल आहे. त्याचा भाऊसुद्धा कारागृहात खुनाच्या गुन्ह्यात शिक्षा भोगत आहे. मंगळवारी पाचपालीतील कुख्यात गुुंड कालू याची न्यायालयात हजेरी होती. त्यामुळे करण पाटील हा सहा फुग्यात गांजा भरून न्यायालय परिसरात उभा होता. कालूमार्फत कारागृहात गांजा पोहचविण्यात येणार होता. पोलिसांना बघून करण लपला होता. त्यामुळे पोलिसांना संशय आला. पोलीस हवालदार सुनील तिवारी यांनी पाठलाग करून करणला ताब्यात घेतले. त्याची झडती घेतली असताना गांजा आढळून आला. कालू हा गुप्तांगात फुगे भरून कारागृहात गांजा नेणार होता, अशी माहिती आरोपीने पोलिसांना दिली. ही कारवाई पोलीस निरीक्षक सार्थक नेहते, उपनिरीक्षक ज्ञानदेव तायडे, भूजंगराव फाटे, सुनील तिवारी, केशव बेलसरे यांनी केली.