लोकसत्ता प्रतिनिधी
जळगाव : शहरातील गुरुदेवनगर भागातील गोदामातून राज्यात बंदी असलेला गुटखा, पानमसाला, सुगंधित तंबाखूसह दोन वाहने व रोकड मिळून सुमारे १९ लाख १४ हजार ६०० रुपयांचा मुद्देमाल जप्त करुन संशयिताला अटक करण्यात आली. एक जण फरार आहे. विशेष पोलीस महासंचालकांच्या पथकाने ही कारवाई केली. याप्रकरणी एमआयडीसी पोलीस ठाण्यात गुन्हा दाखल करण्यात आला आहे.
आणखी वाचा-जळगावात सराफ बाजाराला झळाळी, सोन्याची मागील वर्षापेक्षा २५ टक्के अधिक विक्री
भगवान पाटील (३०, आव्हाणी, धरणगाव) असे अटक करण्यात आलेल्याचे नाव आहे. पोलिसांच्या माहितीनुसार, शहरातील गुरुदेवनगर भागातील गोदामात गुटखा साठवून ठेवण्यासह त्याची विक्री केली जात असल्याची माहिती विशेष पोलीस महानिरीक्षकांच्या पथकाला मिळाली. त्याअनुषंगाने पथकाने गोदामात छापा टाकला. तेथे राज्यात बंदी असलेल्या विविध प्रकारचे पानमसाले, जर्दा तंबाखू, गुटखा, सुगंधित तंबाखू, असा सुमारे नऊ लाख ९१ हजार ६०० रुपयांचा साठा, नऊ लाखांची दोन वाहने, २३ हजारांची रोकड, असा १९ लाख १४ हजार ६०० रुपयांचा मुद्देमाल मिळून आला. पथकाने तो जप्त केला. याप्रकरणी विशेष पोलीस महानिरीक्षकांच्या पथकातील हवालदार रवींद्र पाडवी यांनी दिलेल्या तक्रारीवरून एमआयडीसी पोलीस ठाण्यात दोघांविरुद्ध गुन्हा दाखल करण्यात आला आहे.
