दोन विषयांत नापास झाल्याने येथील जवाहर नर्सिंग प्रशिक्षण केंद्रात शिक्षण घेणाऱ्या विद्यार्थिनीने विष घेऊन आत्महत्या केली. धुळे तालुक्यातील आर्वी येथे ही घटना घडली. या घटनेची नोंद धुळे तालुका पोलिसांनी केली आहे. सोनाली वाघ (१९, रा. हट्टी इंदवे, साक्री) असे या विद्यार्थिनीचे नाव असून ती शिक्षणासाठी तिच्या मावशीकडे आर्वी येथे राहत होती.
हेही वाचा >>> गोंदिया : शालेय पोषण आहाराची अफरातफर! अंगणवाडीच्या शेजारील वाडीत सापडली मिरची पावडरची पाकिटे
जवाहर वैद्यकीय महाविद्यालयात परिचारिकेचे प्रशिक्षण घेत असताना सोनाली दोन विषयांत नापास झाली. यामुळे मानसिक तणाव आल्याने तिने १५ ऑक्टोबर रोजी दुपारी आर्वी येथे राहत्या घरात विषारी द्रव प्राशन केले. यामुळे तिला त्रास सुरू झाल्याने जिल्हा रुग्णालयात दाखल करण्यात आले होते. यावेळी विषारी द्रव प्राशन का केले, असे तिला विचारण्यात आले असता, परीक्षेत दोन विषयात नापास झाले, त्या मानसिक तणावातून विष प्राशन केल्याचे तिने नातेवाईकांना सांगितले होते, अशी माहिती तिच्या कुटुंबीयांनी पोलिसांना दिली. १७ ऑक्टोबर रोजी सोनालीची प्रकृती अधिकच खालावली. डॉ. शुभम गेडाम यांनी तिला मृत घोषित केले.
