नाशिक: गुजरातमधील बारडोली शहराजवळ शुक्रवारी पहाटे मालमोटर अपघातात नाशिकच्या बागलाण तालुक्यातील तीन मजुरांचा जागीच मृत्यू झाला. पाच जण जखमी आहेत. डाळिंब छाटणी करण्यासाठी बागलाण तालुक्यातील खमताणे परिसरातील छाटणी कामगार भाजीपाला वाहतूक करणाऱ्या मालमोटारीने सुरतकडे निघाले होते. बारडोलीजवळ चालकाचे नियंत्रण सुटल्याने मालमोटार उलटली. या अपघातात पिंटू पवार (४०), सोनू मोरे (३५), भाऊसाहेब बागूल (५०, तिघेही खमताणे) यांचा जागीच मृत्यू झाला.
हेही वाचा : नाशिक: लाच स्वीकारताना पोलीस नाईक जाळ्यात
बाबाजी पवार, भाऊसाहेब पवार, आकाश माळी, तुळशीराम सोनवणे ( रा.तळवाडे, बागलाण), दादा केरसानेकर हे गंभीर जखमी झाले. त्यांना सुरत येथील शासकीय रुग्णालयात दाखल करण्यात आले आहे. अपघाताची माहिती घटनास्थळावर उपस्थित बागलाणमधील एका चालकाने आमदार दिलीप बोरसे यांना देत मदतीची मागणी केली. बोरसे यांनी बारडोलीचे आमदार ईश्वरभाई परमार यांच्याशी संपर्क साधून अपघातग्रस्तांना मदतीची विनंती केली. त्यानंतर परमार यांनी रुग्णवाहिका उपलब्ध करून जखमींना सुरत येथील शासकीय रुग्णालयात दाखल केले.
