जळगाव - राज्यात कृषी उत्पन्न बाजार समित्यांची निवडणूक भाजपा-शिवसेनेने एकत्रित लढविण्याचे ठरविले असले तरी पाचोरा-भडगाव बाजार समितीत भाजपा स्वबळावरच लढणार आहे. या निवडणुकीसाठी भाजपातर्फे बहुसंख्य उमेदवारांनी अर्ज दाखल केले आहेत. निवडणुकीत भाजपासोबत काही समविचारी उमेदवार निवडणूक लढत आहेत. ही निवडणूक भाजपाचे तालुकाध्यक्ष अमोल शिंदे यांच्या मार्गदर्शनाखाली आणि समितीचे माजी सभापती सतीश शिंदे यांच्या नेतृत्वाखाली लढविली जाणार असून, उमेदवारांसह भाजपाच्या कार्यकर्त्यांनी मतदारांशी स्वतंत्र संपर्कही सुरू केला आहे. हेही वाचा - दादा भुसेंची आदित्य ठाकरेंवर बोचरी टीका, राहुल गांधींशी तुलना करत म्हणाले, “छोटे युवराज…” आपण ही निवडणूक स्वबळावर लढणार आहोत. तरी आमदारांनी केलेल्या कुठल्याही प्रकारच्या अफवांना मतदारांनी व कार्यकर्त्यांनी बळी पडू नये, तालुक्यांतील पदाधिकारी व कार्यकर्ते एकसंघ असून, निवडणुकीसाठी ताकदीने कामाला लागले आहेत, असे तालुकाध्यक्ष शिंदे यांनी म्हटले आहे. हेही वाचा - उद्धव ठाकरे २३ एप्रिलला जळगाव जिल्हा दौऱ्यावर; पाचोरा येथे कार्यक्रमांच्या नियोजनासाठी उद्या जिल्हास्तरीय बैठक आमदारांच्या पायाखालची वाळू सरकल्यामुळे आमदार दुसऱ्या पक्षांचे प्रवक्तेपद बळजबरीने उसने भाड्याने घेतल्यासारखे पत्रकार परिषदा घेत फिरत आहेत. त्यांची स्वबळावर निवडणुका लढविण्याची ताकद पूर्णपणे खचली असल्याने आमदारांना व त्यांच्या उर्वरित उमेदवारांना कुठलाही आत्मविश्वास उरलेला दिसत नाही, असा टोलाही तालुकाध्यक्ष शिंदे यांनी लगावला आहे.
