लोकसत्ता प्रतिनिधी
नाशिक : दसऱ्याच्या दिवशी रामकुंडावर होणारा रावण दहन कार्यक्रम आणि शहरातील देवी मूर्ती विर्सजन निमित्ताने परिसरातील वाहतूक मार्गात बदल करण्यात आला आहे. दसऱ्यानिमित्त येथील चतुर्संप्रदाय आखाडा यांच्या वतीने रावण दहनाचा कार्यक्रम आयोजित करण्यात आला आहे. रावण दहनापूर्वी राम लक्ष्मण सेनेची मिरवणूक आखाडाच्या वतीने शनिवारी सायंकाळी सहा वाजता सुरू होईल.
मालेगाव स्टॅंड-पंचवटी कारंजा-मालवीय चौक-शिवाजी चौक-सीतागुंफा-श्री काळाराम मंदिर-सरदार चौक-साईबाबा मंदिरमार्गे रामकुंडाजवळील वाहनतळ मैदान येथे मिरवणूक येईल. या ठिकाणी राम व रावण युध्द होऊन रात्री १० वाजता रावण दहनाचा कार्यक्रम होईल. हा कार्यक्रम पाहण्यासाठी मोठ्या प्रमाणावर गर्दी होण्याची शक्यता आहे. शहरातील नवरात्रोत्सव सार्वजनिक मंडळांकडून रामकुंडावर देवी मूर्तींचे विसर्जन करण्यात येणार असल्याने न मिरवणुकीने देवी मूर्ती वाहनांमधून आणल्या जातात. त्यामुळे परिसरात मोठ्या प्रमाणावर वाहतूक कोंडी होण्याची शक्यता आहे.
आणखी वाचा-वन विभागाचे अरण्यक केंद्र ग्राहकांच्या प्रतिक्षेत
या अनुषंगाने शनिवारी दुपारी तीनपासून रात्री १० पर्यंत मालेगाव स्टॅण्डकडून रामकुंड-सरदार चौक ते गाडगे महाराज पूल तसेच गाडगे महाराज पुलाकडून सरदार चौक-रामकुंड ते मालेगाव स्टँण्डकडे जा-ये करणाऱ्या सर्व प्रकारच्या वाहनांना वाहतुकीसाठी प्रवेश बंद राहणार आहे. वाहनचालकांनी गणेशवाडी-काट्यामारूती चौकी-निमाणी बस स्थानक- पंचवटी कारंजा यामार्गे इतरत्र ये-जा करावी, वाहनचालकांनी सहकार्य करावे असे आवाहन वाहतूक विभागाच्या वतीने करण्यात आले आहे.
