लोकसत्ता विशेष प्रतिनिधी
नाशिक : अंगणातील माती खातो म्हणून दोन वर्षाच्या बालकास ११ वर्षाच्या मावसभावाने मारहाण केली. मारहाणीत बालक खडीवर पडल्याने जोरात रडू लागला. त्याला शांत करण्याच्या प्रयत्नात मावसभावाकडून गळा दाबला गेल्याने बालकाचा मृत्यू झाला.
आडगाव शिवारातील लेंडीनाला भागात नऊ ऑक्टोबर रोजी हा धक्कादायक प्रकार घडला. शवविच्छेदन अहवाल आणि मृत बालकाच्या अल्पवयीन भावाकडे केलेल्या चौकशीतून हे उघड झाल्याचे पोलीस तक्रारीत म्हटले आहे. या घटनेत वीर बोके (दोन वर्ष) या बालकाचा मृत्यू झाला.
आणखी वाचा-मुसळधार पावसाचा ३८ हजार हेक्टरवरील पिकांना फटका; चांदवड, देवळा, पेठमध्ये सर्वाधिक नुकसान
वीर आणि अल्पवयीन मावसभाऊ लेंडीनाला भागात शेजारी शेजारी वास्तव्यास आहेत. नऊ ऑक्टोबरला वीर हा दुपारी आपल्या घरासमोरील अंगणात खेळत असताना माती खात होता. हे पाहून अल्पवयीन मावसभावाने माती खाण्यापासून रोखण्यासाठी त्याला बुक्क्यांनी मारहाण केली. यात खडीवर पडल्याने वीर यास लागल्याने तो जोरजोरात रडू लागला. त्याला शांत करण्याच्या प्रयत्नात मावसभावाकडून वीरचा गळा दाबला गेल्याने त्याचा मृत्यू झाला. या प्रकरणी आडगाव पोलीस ठाण्यात ११ वर्षीय मावसभावाविरुध्द भारतीय न्याय संहितेनुसार गुन्हा दाखल करण्यात आला आहे.
आणखी वाचा-मद्य, गुटख्यासह ६४ लाखांपेक्षा अधिकचा मुद्देमाल जप्त – ग्रामीण पोलिसांची कामगिरी
दरम्यान, अल्पवयीन संशयितांवर कारवाई करताना वयोगटानुसार काही निकष आहेत. हा संशयित मुलगा सात ते १२ वयोगटात मोडतो. तपास यंत्रणा संशयिताच्या वयाचे पुरावे संकलित करीत आहे. कायद्यातील तरतुदीनुसार संशयितास बालकल्याण समितीसमोर हजर केले जाईल, असे सहायक पोलीस उपनिरीक्षक मयूर निकम यांनी सांगितले.
