लोकसत्ता विशेष प्रतिनिधी
नाशिक: शहराची स्वच्छता आणि आगामी सिंहस्थ कुंभमेळ्याची तयारी या दोन विषयांना प्राधान्य दिले जाणार असल्याचे महानगरपालिकेचे नूतन आयुक्त डॉ. अशोक करंजकर यांनी म्हटले आहे. तीन महिन्यांपासून रिक्त असणाऱ्या आयुक्त पदावर डॉ. करंजकर यांची नियुक्ती झाली. कार्यभार स्वीकारल्यानंतर ते बोलत होते.
तत्कालीन आयुक्त डॉ. चंद्रकांत पुलकुंडवार हे मसुरी येथे प्रशिक्षणासाठी गेले असताना शासनाने त्यांची साखर आयुक्तपदी बदली केली होती. तेव्हापासून म्हणजे जवळपास तीन महिन्यांपासून मनपा आयुक्तपदाचा कार्यभार वेगवेगळ्या अधिकाऱ्यांकडे सोपविला गेला. पूर्णवेळ आयुक्त नसल्याने अनेक महत्वाचे विषय प्रलंबित राहिल्याचा सूर उमटत होता. शिवसेना, भाजपच्या मंत्र्यांमधील सुप्त संघर्षातून पूर्णवेळ आयुक्त नियुक्ती रखडल्याची चर्चा राजकीय वर्तुळात सुरू होती. अखेर दीर्घ प्रतिक्षेनंतर शासनाने राज्य कामगार विमा योजनेचे आयुक्त डॉ. करंजकर यांची आयुक्तपदी नियुक्ती केली. मूळचे उस्मानाबादचे असणारे डॉ. करंजकर हे भारतीय प्रशासकीय सेवेच्या २००९ च्या तुकडीतील अधिकारी आहेत. यापूर्वी त्यांनी कृषी विकास महामंडळाचे व्यवस्थापकीय संचालक, ठाणे महानगर परिवहन मंडळाचे महाव्यवस्थापक, अपर जिल्हाधिकारी, मुद्रांक विभागाचे नोंदणी उपमहानिरीक्षक आदी पदांची जबाबदारी सांभाळलेली आहे. महापालिकेत अधिकाऱ्यांनी त्यांचे स्वागत केले.
आणखी वाचा-Video: समृध्दी महामार्गावर अमित ठाकरे यांचे वाहन रोखल्याने टोल नाक्याची तोडफोड
प्रसारमाध्यमांशी संवाद साधताना डॉ. करंजकर यांनी स्वच्छता अभियानात नाशिकचा क्रमांक बराच घसरल्याकडे लक्ष वेधले. आगामी कुंभमेळ्यात शहरात मोठ्या संख्येने भाविक येतील. पाहुणे येणार असतील तर आपण घर आवरतो, स्वच्छ ठेवतो. त्याच धर्तीवर, नाशिक शहर स्वच्छ ठेवण्याकडे लक्ष दिले जाईल. सिंहस्थ कुंभमेळ्याची तयारी महत्वाची आहे. त्या अनुषंगाने नियोजन, प्रस्तावित वळण रस्ते प्रकल्पांना गती देऊन ते जलदगतीने पूर्ण करण्यास प्राधान्य दिले जाईल. मनपाच्या उत्पन्न वाढीसाठी मालमत्ता कर, पाणीपट्टीबरोबर अन्य स्त्रोत निर्माण करण्यावर लक्ष दिले जाईल. पूर्णवेळ आयुक्त नसतानाच्या काळात मंजूर झालेल्या फाईल्सची पडताळणी केली जाईल. काही अनियमितता आढळल्यास त्या पूर्वस्थितीत आणल्या जातील, असे सांगितले.
