नाशिक – शहरात २७ व्या राष्ट्रीय युवा महोत्सवाच्या उद्घाटनावेळी पंतप्रधान नरेंद्र मोदी यांचा निलगिरी बाग येथील हेलिपॅड ते पंचवटीतील तपोवनातील कार्यक्रम स्थळ असा साधारणत: दोन किलोमीटरचा रोड शो होणार आहे. विशेष संरक्षण दलाकडून (एसपीजी) परिसराचे सुरक्षेच्या दृष्टीने अवलोकन केल्यानंतर रोड शोचा मार्ग निश्चित होईल. महोत्सवाची अहोरात्र तयारी सुरू असून त्याचा आढावा घेण्यासाठी मुख्यमंत्री एकनाथ शिंदे हे सोमवारी दुपारी येथे दाखल होत आहेत.
विकसित भारत २०४७ या संकल्पनेवर आधारीत राष्ट्रीय युवा महोत्सव १२ ते १६ जानेवारी या कालावधीत शहरात होत आहे. त्याचे उद्घाटन तपोवन येथील मैदानावर पंतप्रधान नरेंद्र मोदी यांच्या हस्ते होणार आहे. या स्थळासह परिसराचे संपूर्ण चित्र पालटले जात आहे. पंतप्रधान मोदी हे विमानाने ओझर विमानतळावर येतील. तेथून हेलिकॉप्टरने शहरात दाखल होतील. कार्यक्रम स्थळापासून जवळच असणाऱ्या निलगिरी बाग येथे हेलिपॅड उभारण्यात आले आहे. पंतप्रधानांचा शहरातील कार्यक्रम दीड तासांचा आहे. हेलिपॅड ते कार्यक्रम स्थळ असा दोन किलोमीटरचा रोड शो होईल, असे जिल्हाधिकारी जलज शर्मा यांनी सांगितले.
हेलिपॅड ते कार्यक्रम स्थळ या दरम्यान दोन ते तीन प्रमुख मार्ग आहेत. यातील कुठल्या मार्गावर रोड शो होईल, हे अद्याप निश्चित झालेले नाही. सुरक्षेच्या दृष्टीने कोणता मार्ग योग्य असेल याचा विचार करून ते निश्चित होईल असे शर्मा यांनी नमूद केले. महोत्सवाच्या तयारीसाठी स्थानिक पातळीवर २० समित्या स्थापन करण्यात आल्या आहेत. ७५ अधिकाऱ्यांवर जबाबदारी सोपविली गेली आहे. महोत्सवातील विविध उपक्रम, स्पर्धा, सांस्कृतिक कार्यक्रम, प्रदर्शनासाठी शहरात सहा स्थळे निश्चित करण्यात आली आहेत. उद्घाटन सोहळ्यासह पाच दिवसीय कार्यक्रमांची समांतरपणे अतिशय वेगात तयारी सुरू असल्याचे जिल्हाधिकारी शर्मा यांनी नमूद केले. युवकांचा हा महोत्सव असून त्यांनी उत्स्फुर्तपणे सहभागी व्हावे, असा आमचा प्रयत्न आहे. संबंधितांना कार्यक्रमात प्राधान्याने पुढील जागा उपलब्ध करून दिली जाणार असल्याचे त्यांनी सूचित केले. युवा महोत्सवाच्या तयारीचा आढावा घेण्यासाठी मुख्यमंत्री एकनाथ शिंदे हे सोमवारी दुपारी नाशिकमध्ये येत आहेत. कार्यक्रम स्थळांची पाहणी केल्यानंतर ते आढावा बैठक घेतील.
सद्यस्थितीत तपोवनात पंतप्रधान मोदींचा ताफा जाणाऱ्या रस्त्यांची दुरुस्ती केली जात आहे. महोत्सवस्थळी भिंतीसारखा काही कंटेनरांचा वापर करण्यात येणार असून त्यांच्यावर महोत्सवाचे शुभंकर, बोधचिन्ह रेखाटण्यात येत आहे. महानगरपालिकेच्या वतीने शहरात विशेष स्वच्छता अभियान यानिमित्ताने राबविण्यात येत आहे.
