लोकसत्ता वार्ताहर
धुळे: प्रादेशिक परिवहन विभागाने परवानगी न घेता आरटीओ कार्यालयासाठी आदिवासींच्या जागेवर अतिक्रमण केल्याचा आरोप करीत शुक्रवारी येथे रिपब्लिकन मजूर कामगार संघटनेतर्फे मोर्चा काढून निषेध करण्यात आला. या संदर्भात शिष्ठमंडळाने जिल्हाधिकार्‍यांना निवेदन दिले.
आदिवासी समाजावर शासनातर्फे जाणीवपूर्वक अन्याय होत असून रिपब्लिकन मजूर कामगार संघटना व रिपब्लिकन पार्टी ऑफ इंडिया यांच्या माध्यमातून केंद्रीय सामाजिक व न्याय मंत्री रामदास आठवले यांच्या निदर्शनास हा प्रकार आणून देण्यात आला असल्याचे निवेदनात म्हटले आहे. धुळे येथील आदिवासी समाजाच्या जमिनीवर महाराष्ट्र शासनाने प्रादेशिक परिवहन महामंडळासाठी कार्यालय थाटण्याचा घाट घातला आहे.
हेही वाचा… बनावट दारु निर्मितीतील संशयित दिनू डाॅन अखेर ताब्यात
पोटहिश्याची मोजणी न करता सामाईक असलेल्या या गटावर आरटीओ कार्यालयासाठी अतिक्रमण करुन आदिवासी समाजाला भूमिहीन केल्याचा आरोप निवेदनात करण्यात आला आहे. निवेदनावर रिपब्लिकन मजूर कामगार संघटनेचे रवींद्र नेटावटे यांच्यासह प्रकाश पिल्ले, उदय पगारे, संजय पाटील, अनिल वाघ आदींची स्वाक्षरी आहे.
