नाशिकमध्ये शनिवारी पाणी पुरवठा बंद , स्काडा प्रणालीसह दुरुस्तीशी संबंधित कामांमुळे निर्णय

जीर्ण झालेल्या वाहिन्यांमधून पाण्याचा होणारा अपव्यय, अनधिकृत जोडण्या अशी काही कारणे त्यामागे असल्याचे सांगितले जाते. शहरात वितरित होणाऱ्या पाण्याचा काटेकोरपणे हिशेब ठेवण्यासाठी स्काडा मीटर प्रणाली कार्यान्वित केली जात आहे. मागील काही महिन्यात पाणी पुरवठ्याशी संबंधित तक्रारींचे प्रमाण वाढले आहे. विस्कळीत पाणी पुरवठ्यावरून वारंवार आंदोलने होत आहेत. या पार्श्वभूमीवर, पाणी पुरवठा वितरण प्रणालीत सुधारणा करण्याची धडपड केली जात आहे.

स्काडा प्रणालीशी संबंधित शहरात विविध कामांचे नियोजन करण्यात आले आहे. यात सर्व विभागातील प्रमुख जलवाहिन्यांमध्ये फ्लो मीटर आणि बटरफ्लाय व्हॉल्व्ह बसविणे, आंतरजोडणी करणे आदींचा समावेश आहे. तसेच या दिवशी मनपाच्या पाणी पुरवठा विभागाने विविध विभागात मुख्य जलवाहिन्या, उपवाहिन्या आणि व्हॉल्व्हची दुरुस्ती, व्हॉल्व्ह बदलणे, गंगापूर रस्त्यावरील छत्रपती शिवाजी महाराज जलतरण तलावासाठी ३०० मिलीमीटर व्यासाची नवीन जलवाहिनी टाकणे आदी कामे करण्याचे नियोजन केले आहे. व्यापक स्वरुपातील या कामांमुळे शनिवारी शहरात संपूर्ण दिवसाचा पाणी पुरवठा बंद ठेवला जाणार आहे. रविवारी सकाळचा पाणी पुरवठा कमी दाबाने होईल. नागरिकांनी नोंद घेऊन सहकार्य करावे, असे महापालिकेने म्हटले आहे.