नाशिक – शालेय शुल्क न भरल्याचे कारण देत माध्यमिक व उच्च माध्यमिक प्रमाणपत्र परीक्षा अर्ज भरताना विद्यार्थ्यांची अडवणूक करू नये. यासंदर्भात लेखी तक्रार प्राप्त झाल्यास संबंधित शाळेवर कारवाई करण्यात येईल, असा इशारा महाराष्ट्र राज्य माध्यमिक व उच्च माध्यमिक शिक्षण मंडळाचे विभागीय सचिव एम. एस. देसले यांनी दिला आहे.
हेही वाचा >>> मद्य दुकानासाठी प्रार्थनास्थळ हटविण्याचा प्रयत्न, युवासेनेची निदर्शने
सध्या शाळा-महाविद्यालयांमध्ये राज्य शिक्षण मंडळाच्या वतीने घेण्यात येणाऱ्या १० वी आणि १२ वी परीक्षेसाठी अर्ज भरण्यात येत आहेत. नाशिक विभागातील स्वंयअर्थसहाय्यित शाळा तसेच इंग्रजी माध्यमाच्या खासगी शाळा, अनुदानित व विनाअनुदानित सर्व माध्यमांच्या शाळांमध्ये काही विद्यार्थ्यांचे परीक्षा अर्ज अद्याप भरलेले नाहीत. शालेय शुल्क न भरल्याने शाळा व्यवस्थापनाकडून परीक्षा अर्ज भरले जात नसल्याच्या तक्रारी येत आहेत. शालेय शुल्काच्या नावाखाली जर विद्यार्थ्यांची अडवणूक करण्यात येत असेल, तसेच विद्यार्थी व पालकांचे मानसिक खच्चीकरण करण्यात येत असेल तर संबंधित शाळांवर कारवाई करण्याचा इशारा देसले यांनी दिला आहे.
© The Indian Express (P) Ltd