नाशिक – सिन्नर तालुक्यातील माळेगाव औद्योगिक वसाहतीतील हिंदुस्तान नॅशनल ग्लास कारखान्यात शुक्रवारी रात्री आठ वाजेच्या सुमारास स्फोट होऊन आग लागली. या दुर्घटनेत कुठलीही जिवितहानी झाली नसल्याचा अंदाज असून घटनास्थळी सर्वत्र काळ्या धुराचे साम्राज्य पसरल्याने गोंधळाचे वातावरण निर्माण झाले. अग्निशमन दलाकडून रात्री उशिरापर्यंत आगीवर नियंत्रण मिळवण्यासाठी प्रयत्न सुरु होते. पाणी टंचाईमुळे आग विझविण्याच्या कामात अवरोध येत होता.
हेही वाचा >>> नरेंद्र मोदी यांच्या उपस्थितीत देशातील युवाशक्ती नाशिकमध्ये अवतरणार
माळेगाव औद्योगिक वसाहतीत हिंदुस्तान नॅशनल ग्लास या कंपनीत काचेच्या बाटल्या तयार केल्या जातात. शुक्रवारी नेहमीप्रमाणे काम सुरू असताना अकस्मात भट्टीचा स्फोट झाल्याचे नाशिक इंडस्ट्रीज ॲण्ड मॅन्युफॅक्चरर्स असोसिएशनचे (निमा) अध्यक्ष धनंजय बेळे यांनी सांगितले. काही वेळात कारखान्यात आग पसरली. कर्मचाऱ्यांनी सावधानता बाळगत बाहेर धाव घेतली. या घटनेची माहिती अग्निशमन दलास दिली गेली. आगीमुळे परिसरात सर्वत्र काळा धूर पसरला. आसपासच्या कामगारांनी मदतीसाठी धाव घेतली. घटनास्थळी दाखल झालेल्या अग्निशमन दलाच्या बंबांना पाणी टंचाईला सामोरे जावे लागल्याचे सांगितले जाते. परिस्थिती गंभीर असल्याने पाण्याचे टँकर पाठवावेत, अशी मागणी घटनास्थळावरून केली जात होती. उपरोक्त कारखान्यातील पाणी उपसणारा पंप वेळेवर सुरू झाला नाही. त्यामुळे आगीवर नियंत्रण मिळवण्यात अडचणी आल्या. निमाचे स्थानिक पदाधिकारीही घटनास्थळी पोहोचले. या दुर्घटनेत कुठलीही जिवितहानी झाली नसल्याचे सिन्नर औद्योगिक वसाहत संघटनेचे (सिमा) सचिव बबन वाजे यांनी सांगितले. उपरोक्त कारखान्यातील भट्टी २४ तास सुरू असते. ती बंद करता येत नाही. कारण, ती बंद केल्यावर थंड व्हायला आणि ती पुन्हा कार्यान्वित होताना बराच कालावधी लागतो. भट्टीत स्फोट होण्याआधी सर्व कामगार बाहेर पळाल्याने ते बचावले, असे वाजे यांनी नमूद केले.
