नाशिक – सिडकोतील शिवाजी चौक व्यापारी संकुलाजवळील छत्रपती शिवाजी महाराजांच्या पुतळ्यासमोर गुरुवारी भाजी विक्रेता संदीप आठवले (२८) हत्या प्रकरणी पाच संशयितांना न्यायालयाने २८ ऑगस्टपर्यंत पोलीस कोठडी सुनावली. तिघा अल्पवयीनांची बालसुधारगृहात रवानगी करण्यात आली.
गुरुवारी दुपारी संदीप आठवले (२२) हा त्याच्या भावासह शिवाजी चौकातील व्यापारी संकुलात असताना त्या ठिकाणी आठजणांच्या टोळक्याने धारदार शस्त्राने संदीपवर वार केले होते. गंभीर दुखापतींमुळे संदीपचा मृत्यू झाला होता.
हेही वाचा – नाशिकमध्ये पुन्हा वाहनांची तोडफोड, तीन संशयित ताब्यात
हेही वाचा – जळगाव : जामनेरनजीक अपघातात तरुण ठार, पाच जखमी
गुन्हेगारांच्या शोधासाठी पथके रवाना करण्यात आली. एमआयडीसी पोलीस चौकीचे उपनिरीक्षक संदीप पवार आणि अंमलदार जनार्धन ढाकणे यांना मिळालेल्या माहितीनुसार पोलीस पथकाने मखमलाबाद येथे जाऊन मुख्य संशयित ओम पवार उर्फ मोठा ओम्या खटकी (१९, पाटीदार पार्क जवळ, आव्हाड पेट्रोल पंपासमोर, पाथर्डी फाटा), ओम चौधरी उर्फ छोटा खटकी (१९, कृष्णा अपार्टमेंट, शिवप्रताप चौक, नवीन नाशिक), साईनाथ मोरताटे उर्फ मॅगी मोऱ्या (१९, रा. महादेव मंदिरासमोर, पवननगर), सौरभ वडनेरे उर्फ बाळा (१९, रा. चामुंडा अपार्टमेंट, पांडव नगरी, इंदिरानगर), अनिल प्रजापती (१९, राजरत्न नगर,नवीन नाशिक) यांच्यासह तीन विधीसंघर्षितांना ताब्यात घेतले. पाच संशयितांना न्यायालयात उभे केले असता त्यांना २८ ऑगस्टपर्यंत पोलीस कोठडी सुनावण्यात आली. तीन अल्पवयीनांना बाल न्यायालयात उभे केले असता त्यांची रवानगी बाल सुधारगृहात करण्यात आली.
