जळगाव – जिल्ह्यात दोन दिवसांत भुसावळ, चाळीसगाव, यावल या तालुक्यांमध्ये चार खून झाल्याने जिल्हा हादरला आहे. यावल तालुक्यातील पिळोदा येथे वृद्ध पित्याचा खून झाल्यानंतर २४ तासांच्या आत रिधुरी येथे रस्त्याच्या वादातून प्रौढाचा खून झाला.
भुसावळ तालुक्यातील फेकरी शिवारात १३ जानेवारीच्या सायंकाळी पैशांसाठी मित्रांमध्ये झालेल्या वादातून भावेश भालेराव (२६, रा. भगवान साळवेनगर, फेकरी) याचा खून झाला होता. त्यानंतर रविवारी चाळीसगावमध्ये क्रिकेट स्पर्धेच्या झालेल्या वादातून मुंबई पोलीस दलातील शुभम ओगोणे (२८, रा. चाळीसगाव) याचा चौघांनी खून केला. त्यापाठोपाठ सोमवारी यावल तालुक्यातील पिळोदा येथे लग्न करून न दिल्याने वृद्ध पित्याचा मुलाने कुर्‍हाडीचे वार करुन खून केला. या घटनेला २४ तास उलटत नाही, तोच यावल तालुक्यातील रिधुरी येथे सोमवारी रात्री रस्त्याच्या वादातून धनराज सोनवणे (५०, रिधुरी, यावल) यांचा खून झाला.
हेही वाचा…जळगावात आदिवासी कोळी समाजाचे झाडाला लटकून आंदोलन
यावल तालुक्यातील रिधुरी गावात सोमवारी रात्री साडेआठच्या सुमारास घराच्या वापराच्या रस्त्यावरून दोन कुटुंबांत वाद झाला. त्याचे पर्यावसान हाणामारीत होऊन धनराज सोनवणे यांच्या डोक्यात कुर्‍हाडीने वार करण्यात आले. त्यात त्यांचा जागीच मृत्यू झाला. हाणामारीत सतीश सोनवणे (३०), आरती सोनवणे (२८) जखमी झाले असून, त्यांना जळगाव येथे रुग्णालयात दाखल करण्यात आले आहे. याप्रकरणी सोनी सोनवणे (रा. रिधुरी) यांनी दिलेल्या फिर्यादीवरून फैजपूर येथील पोलीस ठाण्यात संशयित सतीश सोनवणे, युवराज सोनवणे, दीपक सोनवणे यांच्याविरुद्ध गुन्हा दाखल करण्यात आला असून, संशयितांना पोलिसांनी अटक केली आहे.
