लोकसत्ता वार्ताहर
धुळे: पुढे खून झाला असल्याने सर्व दागिने काढून ठेवा, अशी थाप मारत पोलीस असल्याचे खोटे सांगून दोघांनी वृद्धाच्या गळ्यातील सोन्याची चैन, दोन अंगठ्या असा ९३ हजाराचा मुद्देमाल लंपास केला. याप्रकरणी नरडाणा पोलीस ठाण्यात गुन्हा दाखल करण्यात आला आहे.
आणखी वाचा-जळगाव जिल्ह्यात विसर्जनावेळी तरुण बुडाला, शोध चालू
यासंदर्भात शिंदखेडा तालुक्यातील विठाई येथील बापूराव पवार (६५) यांनी दिलेल्या तक्रारीनुसार गुरुवारी सकाळी ११ वाजता शिंदखेडा तालुक्यातील गोराणे फाट्यावर दोन जण मोटारसायकलने आले. त्यापैकी एकाने बापूराव यांना आपण पोलीस असल्याचे सांगून इकडे खून झाला असताना तुम्ही एवढे सोने घालून कुठे चाललात, अशी विचारणा केली. अंगावरील दागिने काढून ठेवा, असे म्हणत दोघांनी पवार यांना ४५ हजार रुपयांची सोन्याची चैन, दोन अंगठ्या त्यांच्याकडील एका कागदात ठेवायला सांगितले. कागदाची पुडी बांधून ती बापूराव यांना दिली. त्यानंतर दोघेही निघून गेले. बापूराव यांनी खिशातील रुमालात कागदी पुडी ठेवली. घरी गेल्यावर ती उघडली असता पुडीत त्यांना खडे बांधलेले दिसले. आपणास फसविण्यात आल्याचे लक्षात येताच त्यांनी नरडाणा पोलीस ठाणे गाठले
