जळगाव : केळी पीकविम्याची मदत प्रलंबित असलेल्या शेतकर्‍यांना तत्काळ नुकसानभरपाई देण्याबरोबरच पूर व अतिवृष्टीमुळे बाधित झालेल्या केळी आणि इतर पीक क्षेत्रांची स्थळपाहणी करून एका आठवड्याच्या आत शंभर टक्के पंचनामे पूर्ण करावेत, असे निर्देश पाणीपुरवठा व स्वच्छतामंत्री तथा पालकमंत्री गुलाबराव पाटील यांनी जिल्हा प्रशासनास दिले आहेत.
केळी पीकविमा प्रलंबित नुकसानभरपाई, मागील आठवड्यात झालेले नुकसान या विषयांवर जिल्ह्यातील विविध सामाजिक संघटना, पदाधिकारी व शेतकर्‍यांनी पालकमंत्र्यांकडे तक्रारी व निवेदने दिली आहेत. यावर पालकमंत्री पाटील यांनी जिल्हाधिकारी आयुष प्रसाद, जिल्हा अधीक्षक कृषी अधिकारी रविशंकर चलवदे व विमा कंपन्यांच्या प्रतिनिधींशी चर्चा केली.
हेही वाचा : उद्यापासून पुन्हा कांदा कोंडी? केंद्राच्या धोरणास विरोध, लिलावापासून दूर राहण्याचा व्यापाऱ्यांचा निर्णय
गेल्या आर्थिक वर्षात केळी विमा काढला होता. मात्र, अद्याप नुकसानभरपाई न मिळालेल्या शेतकर्‍यांना भरपाई मंजूर करण्याची जबाबदारी विमा कंपनीची आहे. विमा कंपनीने या कामात हलगर्जीपणा करू नये. शेतकर्‍यांना आठवडाभरात नुकसानभरपाई त्यांच्या बँक खात्यात थेट वर्ग करावी. विमा कंपनीच्या कामावर जिल्हाधिकारी व कृषी विभागाच्या अधिकार्‍यांनी स्वतः लक्ष घालावे, अशा सूचना पालकमंत्री पाटील यांनी दिल्या आहेत.
हेही वाचा : सिन्नरमध्ये जिंदालचा नवीन प्रकल्प; पेट्रोलियम उद्योगासाठी सामग्रीची देशात निर्मिती
तापी नदीला आलेला पूर व हतनूर पाणी फुगवट्यामुळे जिल्ह्यातील रावेर, यावल, मुक्ताईनगर, भुसावळ, जामनेर, बोदवड, चोपडा व जळगाव या तालुक्यांतील काही भागांतील बहुसंख्य शेतकर्‍यांच्या केळी व इतर पिकांचे अतोनात नुकसान झाले आहे. या भागात महसूल व कृषी यंत्रणा तत्काळ सक्रिय करण्यात यावी. तलाठी व कृषी सहायकांनी मुख्यालय सोडून न जाता आठवड्याच्या आत शंभर टक्के पंचनामे पूर्ण करण्याचे आदेश पालकमंत्र्यांनी दिले आहेत.