मुसळधार पावसाचा तडाखा ; तासाभरात २८.४ मिलीमीटरची नोंद

यंदाच्या हंगामात जुलैच्या मध्यापासून शहरासह जिल्ह्यास अनेकदा पावसाचा तडाखा बसला आहे. मध्यंतरी अवघ्या तासाभराच्या पावसाने शहरात दाणादाण उडवली होती. त्याचीच काहिअंशी पुनरावृत्ती मंगळवारी झाली. विजांच्या कडकडाटासह दुपारी अडीचच्या सुमारास मुसळधार पाऊस सुरू झाला. तासाभरात २८.४ मिलीमीटर पावसाची नोंद झाल्याची माहिती हवामानशास्त्र विभागाने दिली. पावसाचा जोर इतका होता की काही मिनिटांत रस्त्यांवरून पाणी वाहू लागले. सखल भागात पाणी साचले. वाहनधारकांना मार्गस्थ होताना तारेवरची कसरत करावी लागली. खड्डे आणि पाण्यामुळे अनेक चौकात काही काळ वाहतूक कोंडी  झाली. गंगापूर रोड भागात भागात एक ते दीड तास वीज पुरवठा खंडित झाला.