धुळे : जिल्हा परिषद अपहार कांडातील संशयित भास्कर शंकर वाघ याच्या घरातून जप्त केलेल्या एकवीरा देवी मंदिरातील दागिन्यांचा १० ऑक्टोबर रोजी न्यायालयाच्या आवारात लिलाव करण्यात येणार आहे. १९९० मध्ये बहुचर्चित धुळे जिल्हा परिषद अपहार कांड झाले होते. या प्रकरणातील मुख्य संशयित भास्कर वाघ याच्याविरुद्ध देवपूर पोलीस ठाण्यात दाखल गुन्ह्याच्या अनुषंगाने धुळे लाचलुचपत प्रतिबंधक विभागाच्या अधिकाऱ्यांनी वाघ याच्या घरातून देवीचे सोने, चांदीचे दागिने जप्त केले होते. जप्त करण्यात आलेल्या दागिन्यांचा लिलाव आता न्यायालयाकडून करण्यात येणार आहे.
हेही वाचा : चाळीसगावात अफू बोंडासह चुरा मिळून २८ लाखांचा मुद्देमाल जप्त
जिल्हा व सत्र न्यायालयाने या लिलावपूर्व नियम आणि अटींची जाणीव करून दिली आहे. लिलावात दागिने घेणाऱ्याने दागिने परत श्री एकविरा देवी देवस्थानास दान करावयाचे आहेत, असे जिल्हा व सत्र न्यायालयाने स्पष्ट केले आहे. जिल्हा न्यायालयाच्या आवारात लिलाव होणाऱ्या या दागिन्यांमध्ये पदक असलेला एक पदरी (६८.५०० ग्रॅम) सोन्याचा चार लाख एक हजार १३४ रुपयांचा हार, कैरीची नक्षी असलेला (१७२ ग्रॅम) सोन्याचा १० लाख नऊ हजार ७१० रुपयांचा चारपदरी हार, पदक आणि कैरीची नक्षी असलेली तीन पदरी (५४.१०० ग्रॅम) सोन्याची तीन लाख १६ हजार ४८५ रुपयांची बिंदी, चांदीचे (१२७.६०० ग्रॅम) नऊ हजार ६० रुपयांचे बाजूबंद, असे आजच्या बाजार भावाप्रमाणे सुमारे १७ लाख ३६ हजार ३८९ रुपये किंमतीचे दागिने या लिलावात ठेवण्यात येणार असल्याची माहिती या खटल्याचे विशेष सरकारी वकील संभाजी देवकर यांनी दिली. जास्तीत जास्त बोली लावणाऱ्याच्या नावे संपूर्ण लिलाव करण्यात येणार असून लिलाव घेणाऱ्याने पूर्ण रक्कम न भरल्यास मुद्देमालाचा फेर लिलाव करण्यात येईल.
