Jalgaon Train Accident : अफवेमुळे रुळावर उड्या, जळगावजवळच्या रेल्वे अपघातात १२ प्रवाशांचा मृत्यू

लखनऊ ते छत्रपती शिवाजी टर्मिनस पुष्पक एक्स्प्रेस बुधवारी दुपारी पावणेचारच्या सुमारास भुसावळहून मुंबईकडे रवाना झाली होती. पाचोरा तालुक्यातील माहेजी ते परधाडे स्थानकांदरम्यान गाडी आली असता पावणेपाचच्या सुमारास इंजिनलगतच्या द्वितीय श्रेणीतील डब्यात आग लागल्याची अफवा पसरली.

हेही वाचा : Jalgaon Train Accident : कर्नाटक एक्स्प्रेसच्या चालकाने भोंगा वाजवला असता तर…

आरडाओरड सुरू झाल्याने घाबरलेल्या प्रवाशांनी तत्काळ गाडी थांबवली आणि डब्यातून उड्या मारल्या. त्याचवेळी बंगळुरूहून दिल्लीकडे जाणाऱ्या कर्नाटक एक्स्प्रेसने रूळावर उभ्या असलेल्या प्रवाशांना धडक दिली. त्यात काही प्रवासी गाडीखाली आल्याने चिरडले गेले, काही दूर फेकले गेले. जिल्हाधिकाऱ्यांनी दिलेल्या माहितीनुसार, रेल्वे अपघातात एकूण ११ जणांचा मृत्यू झाला आहे. याशिवाय चार प्रवासी गंभीर जखमी आणि १६ किरकोळ जखमी आहेत. सर्व जखमींना जळगावसह पाचोरा येथील रुग्णालयात दाखल करण्यात आले आहे.

घटनेची माहिती मिळताच जिल्हाधिकारी आयुष प्रसाद, पोलीस अधीक्षक महेश्वर रेड्डी, मध्य रेल्वेच्या भुसावळ विभागाच्या अधिकाऱ्यांनी घटनास्थळ गाठले. सर्व जखमींना जळगावसह पाचोरा येथे दाखल करण्यात आले. मंत्री गिरीश महाजन यांच्यासह खासदार स्मिता वाघ व इतर अधिकाऱ्यांनी घटनास्थळी भेट देऊन बचाव कार्याला वेग देऊन आढावा घेतला.

हेही वाचा : त्र्यंबकेश्वरात उद्यापासून संत निवृत्तीनाथ यात्रोत्सव

मृतांच्या नातेवाईकांना पाच लाखांची मदत

दुर्घटनेतील मृतांच्या नातेवाईकांना राज्य सरकारने प्रत्येकी पाच लाख रुपयांची मदत जाहीर केली आहे. तसेच जखमींवरील उपचारांचा खर्च राज्य सरकार करेल असे मुख्यमंत्री देवेंद्र फडणवीस यांनी दावोस येथून जाहीर केले आहे.

रेल्वे अपघाताबाबत मुख्यमंत्र्यांशी चर्चा करून माहिती घेतली. स्थानिक प्रशासन सर्व ती मदत करत आहे. मृतांच्या कुटुंबीयांप्रति सहवेदना असून, जखमींच्या प्रकृतीला लवकर आराम पडो. -अमित शहा, केंद्रीय गृहमंत्री

जिल्हा प्रशासन रेल्वे प्रशासनाशी समन्वयाने काम करत आहे. सामान्य रुग्णालय तसेच नजीकच्या खाजगी रुग्णालयांना जखमींवर उपचारासाठी सज्ज ठेवण्यात आले आहे. -देवेंद्र फडणवीस, मुख्यमंत्री