जळगाव : जिल्ह्यातील महिला मतदारांची संख्या पुरुषांच्या तुलनेत वाढली असून, २७ ऑक्टोबर ते २४ डिसेंबर या दोन महिन्यांत जिल्ह्यात महिला मतदारांमध्ये २२, ६८१ ने वाढ झाली आहे. आता जिल्ह्यात १६ लाख ७९ हजार ७६७ मतदार झाले आहेत. याच काळात पुरुष मतदारांमध्ये ४४ हजार २८० ने वाढ झाली आहे. पुरुष मतदारांमागे महिला मतदारांची सरासरीत चारने वाढ होत ९२१ वरून ९२५ इतकी सरासरी झाली आहे. भुसावळ, जळगाव शहर, एरंडोल, चाळीसगाव व जामनेरमध्ये महिला मतदार सर्वाधिक वाढले आहेत. जिल्हा निवडणूक विभागाने मतदार नोंदणीसाठी राबविलेल्या विविध उपक्रमांमुळे जिल्ह्यातील महिला मतदारांची संख्या पुरूषांच्या तुलनेत वाढली आहे. जिल्ह्यात १६ लाख ५७ हजार ७६ महिला मतदारसंख्या होती. २७ ऑक्टोबर ते २४ डिसेंबर या दोन महिन्यांतील विशेष संक्षिप्त पुनर्निरीक्षण मतदार नोंदणी कार्यक्रमातील आकडेवारीनुसार जिल्ह्यात मतदारसंख्या वाढ झाली आहे.
हेही वाचा : “भाजप अयोध्येत रामचरणी तर, ठाकरे गट रामभूमीत”, संजय राऊतांचे विधान
जिल्हाधिकारी आयुष प्रसाद यांच्या मार्गदर्शनाखाली उपजिल्हा निवडणूक अधिकारी श्रीकुमार चिंचकर यांनी गेल्या काही महिन्यांत महिला मतदारांची संख्या वाढविण्यासाठी विविध उपक्रम व शिबिरांचे आयोजन केले होते. विशेष संक्षिप्त पुनरीक्षण कार्यक्रमानुसार जळगाव शहरात २, ७९२, भुसावळ २, ५२८, एरंडोल २, २२४, चाळीसगाव २, ३२२ आणि जामनेर शहरात २, २१८ महिला मतदार वाढले आहेत. त्याखालोखाल चोपडा, जळगाव ग्रामीण, अमळनेर, एरंडोल, पाचोरा व मुक्ताईनगर या मतदारसंघांचा क्रमांक लागतो. जिल्ह्यात दोन आणि तीन डिसेंबरला तृतीयपंथीयांसाठी मतदार नोंदणीची विशेष शिबिरे घेण्यात आली. यामुळे तृतीयपंथीय मतदारांची संख्याही आठने वाढली आहे. पाच जानेवारी २०२३ रोजी जिल्ह्यात १२३ तृतीयपंथीय मतदार होते. आता १३१ तृतीयपंथीय मतदार आहेत. जिल्ह्यात भुसावळ, जळगाव शहर व चाळीसगावमध्ये सर्वाधिक तृतीयपंथीय मतदार आहेत.
हेही वाचा : नाशिक : सप्तश्रृंग गडावर भाविकांच्या वाहनाचा पेट
“राज्यात नऊ डिसेंबरला मतदार नोंदणीची मुदत संपली. मात्र, निवडणूक आयोगाने नऊ डिसेंबरनंतरही मतदार नोंदणीची संधी दिली आहे. यासाठी अर्ज ऑनलाइन, ऑफलाइन भरता येणार आहेत. तेव्हा जास्तीत जास्त नवमतदारांनी ऑफलाइन किंवा व्होटर रजिस्टर अॅपच्या मदतीने लवकरात लवकर नोंदणी करावी.” – आयुष प्रसाद (जिल्हाधिकारी, जळगाव)
