जळगाव : ट्रॅक्टरचोरीचा तपास करीत असताना यावल येथील पोलिसांना चोरट्यांची मोठी टोळीच हाती लागली असून, १८ संशयितांना अटक करुन १३ दुचाकी हस्तगत केल्या. त्यांपैकी दोन दुचाकी परराज्यातील असून, यामुळे चोरट्यांनी इतर परराज्यांतही चोरीची करामत केल्याचे उघड झाले आहे. यावल येथील कुंभारवाड्यातील अजय पंडित (३०) यांची दुचाकी, तर कुंभार टेकडी भागातील जाकीर हुसेन रस्त्यावरील फुलचंद रामचंद्र यांच्या घरासमोरून ७५ हजारांचे ट्रॅक्टर चोरीस गेले होते. तपास करताना पोलिसांनी शहरातील १८ संशयितांना अटक केली. त्यांनी ३७ दुचाकी व ट्रॅक्टर चोरी केल्याची कबुली दिली. जळगाव जिल्ह्यातील विविध भागांतून, तसेच सुरत (गुजरात) व अन्य भागातून दुचाकी चोरल्याचे उघड झाले. चोरीच्या १३ दुचाकी पोलिसांनी हस्तगत केल्या. दुचाकींची चोरी केल्यानंतर दलालांमार्फत त्यांची विक्री करण्याचा उद्योग शहरातील तरुण करीत होते.
हेही वाचा : समीर भुजबळ नाशिकच्या राजकारणातून बाहेर?
अटक करण्यात आलेल्यांमध्ये हर्षल गजरे (२०), उमेश घारू (४९), विशाल वाणी (३०, रा. फिल्टर हाउस, बोलावल गेट), सुरेश कुंभार (५२), सर्फराज तडवी (२२), संजय भोई (३०), अशरफ ऊर्फ गोलू तडवी (१९), देविदास ऊर्फ साहील बारसे (१६), अर्जुन कुंभार (१९, सर्व रा. बोरावल गेट), रवींद्र कुंभार (२५), आकाश कुंभार (१९, रा. कुंभारवाडा), जावेद खान (२२, रा. बाबानगर), सागर ऊर्फ उमेश सपकाळे (२७, बाहेरपुरा), विनोद कुंभार (२४, गायत्रीनगर), जावेद खान (३९, ख्वाजानगर, यावल), राजेंद्र महाजन (३८, रा. यावल), रवींद्र कोळी (४०, दहिगाव), सलीम तडवी (२४, विरावली) यांचा समावेश आहे. या प्रकरणात एका विधीसंघर्ष बालकास नोटीस बजावण्यात आली आहे. या प्रकरणात १३ दुचाकी हस्तगत करण्यात आल्या असून, त्यांपैकी सुरत, बर्‍हाणपूर, अमळनेर, व यावल येथील पाच मालकांचा तपशील मिळाला आहे.
