भाजप मंत्र्याने मंचावरुन दिला ‘जय राष्ट्रवादी’चा नारा; नंतर केली सारवासारव

पूर्वीश्रमीचे राष्ट्रवादीचे मंत्री डॉ. गावित हे दशकभरापासून भाजपमध्ये आहेत. राष्ट्रवादीला सोडचिठ्ठी दिल्यानंतर भाजप या नव्या पक्षात ते रुळले. मागील दोन निवडणुका त्यांनी भाजपच्या तिकीटावर जिंकल्या. परंतु, त्यांना अद्याप राष्ट्रवादीची आठवण येते की काय, अशी साशंकता या निमित्ताने उपस्थितांमधून व्यक्त झाली. तोरणमाळ महोत्सवाच्या कार्यक्रमाचे डॉ. गावित यांच्या हस्ते उद्घाटन झाले. यावेळी व्यासपीठावरुन बोलताना त्यांनी आदिवासी विकासच्या माध्यमातून वन विभाग आणि पर्यटन विभागाच्या मदतीने तोरणमाळचा पर्यटन स्थळाच्या दृष्टीने कसा कायापालट होईल हे मांडले.

हेही वाचा : तोरणमाळमध्ये वैविध्यपूर्ण पर्यटनाच्या संधी, आदिवासी महोत्सवात डाॅ. विजयकुमार गावित यांचे प्रतिपादन

भाषण संपवताना त्यांनी ‘जय हिंद, जय महाराष्ट्र’ ऐवजी ‘जय हिंद, जय राष्ट्रवादी’, असा नारा दिला. त्यामुळे उपस्थितांच्या भुवया उंचावल्या. भाषणाच्या ओघात अनावधानाने बोलल्या गेलेल्या जय राष्ट्रवादीची त्यांनी क्षणार्धात दुरुस्ती केली. मात्र या विधानाने उलटसुलट चर्चा सुरू झाली. कधीकाळी राष्ट्रवादीत राहिलेले डॉ. विजयकुमार गावित घरवापसी करतात की काय, या चर्चेला उधाण आले आहे. डॉ. गावित यांची कन्या डॉ. हिना गावित या भाजपच्या खासदार आहेत तर दुसरी कन्या डॉ. सुप्रिया गावित या जिल्हा परिषद अध्यक्ष आहेत.