नाशिक: वावीत घरफोडी करणारी टोळी ताब्यात, चोरीला गेलेला मुद्देमाल हस्तगत

नाशिक : सिन्नर तालुक्यातील वावी येथे दिवसा घरफोडी करणाऱ्या टोळीस स्थानिक गुन्हे शाखेने जेरबंद केले. त्यांच्याकडून २५ लाखांचा मुद्देमाल हस्तगत करण्यात आला आहे. संशयितांना पुढील तपासासाठी वावी पोलिसांच्या ताब्यात देण्यात आले आहे. वावी येथील मयुरेश काळे यांच्या बंद घराचा कडीकोयंडा दुपारच्या सुमारास काढून चोरांनी रोख रक्कम , दागिने लंपास केले. या गुन्ह्याचा तपास करत असताना स्थानिक गुन्हे शाखेला काही माहिती मिळाली. तांत्रिक तपास करुन सुनील म्हस्के (३१, साबरवाडी), चांगदेव देवडे (३५, बदापूर), कैलास मढवई (३४, चिंचोडी), अक्रम शेख (३१, विंचुर रोड), जीवन कोल्हे (२६, हडप सावरगाव), अलका जेजूरकर (४८, येवला) यांना ताब्यात घेण्यात आले. त्यांच्याकडून चोरलेल्या रोख रकमेतील १४ लाख सात हजार रुपये, चोरीस गेलेले दागिने, चोरीच्या पैशांंतून खरेदी केलेला भ्रमणध्वनी, गुन्ह्यात वापरलेले वाहन असा २५ लाख रुपयांचा मुद्देमाल हस्तगत करण्यात आला.