नाशिक : सिडकोत पाण्यासाठी आंदोलन, महापालिकेचा निषेध

अनेक दिवसांपासून सिडकोतील रायगड चौक परिसरात पाणीपुरवठा विस्कळीत झाला आहे. अशी परिस्थिती सिडकोत ठिकठिकाणी आहे. याबाबत स्थानिकांकडून महापालिकेच्या अधिकाऱ्यांकडे वारंवार तक्रारी करूनही दुर्लक्ष केले जात आहे. त्यामुळे समस्या कायम आहे. अधिकारी आणि पाणी सोडणाऱ्या कर्मचाऱ्यांकडून अरेरावी केली जात असल्याने महिलांमध्ये संताप आहे. या संतापाचा उद्रेक सोमवारी झाला. पाणी पुरवठा सुरळीत करावा, या मागणीसाठी सकाळी साडेआठ वाजता रायगड चौकातील रहिवाशांनी मोर्चा काढत चौकातील मुख्य रस्त्यावर ठिय्या दिला. त्यामुळे वाहतूक ठप्प झाली. आंदोलनामुळे दुतर्फा वाहनांची मोठ्या प्रमाणात रांग लागली होती.

आंदोलनात कुठलाही अनुचित प्रकार घडू नये यासाठी पोलिसांचा मोठा फौजफाटा दाखल झाला होता. आंदोलनाची माहिती समजताच प्रभागाचे माजी नगरसेवक शिवसेनेचे (सुधाकर बडगुजर) सुधाकर बडगुजर घटनास्थळी दाखल झाले. त्यानंतर पाणी पुरवठा विभागाचे उपअभियंता ए. जे. काझी हेही आले. उपअभियंता काझी यांनी दुपारी १२ वाजेपर्यंत पाणी पुरवठा सुरळीत करण्याचे आश्वासन दिल्यानंतर आंदोलन मागे घेण्यात आले. रायगड चौक परिसरातील रहिवासी महापालिकेची नियमित घरपट्टी व पाणीपट्टी भरत असल्याने या भागात पाणी पुरवठा सुरळीत न झाल्यास महापालिकेवर हंडा मोर्चा काढला जाईल, असा इशारा महिलांनी दिला.

रायगड चौकात पाण्याची समस्या निर्माण झाली आहे. मनपा सिडको पाणीपुरवठा विभागाने पाणी पुरवठा सुरळीत करण्यासाठी अधिकाऱ्यांना निर्देश दिले आहेत.

सुधाकर बडगुजर (जिल्हाप्रमुख तथा माजी नगरसेवक -शिवसेना उध्दव ठाकरे)

रायगड चौक येथील पाणीपुरवठा करणाऱ्या व्हाॅल्व्हमनची स्थानिक रहिवाशांनी तक्रार केल्यानंतर या भागात नवीन व्हाॅल्व्हमनची नियुक्ती करण्यात येणार आहे. या भागातील पाणीपुरवठा सुरळीत केला जाईल

ए. जे. काझी (उपअभियंता, पाणी पुरवठा विभाग, सिडको)