नाशिक : अन्न व औषध प्रशासन विभागाच्या वतीने सिडकोतील एका दुकानावर छापा टाकून एक लाख १८ हजार ३० रुपयांचा गुटखा हस्तगत करण्यात आला. सिडकोतील मे. शिवम ट्रेडर्स या संदीप मुसळे यांच्या दुकानावर अन्न व औषध प्रशासनाने छापा टाकला. जर्दा, विविध प्रकारचे सुगंधित पानमसाले असा प्रतिबंधित २२ हजारांपेक्षा अधिक किंमतीचा साठा जप्त करण्यात आला. मुसळे यांच्या मालकीच्या मोगल नगर येथील गोदामात तपास केला असता त्या ठिकाणाहून ९५ हजारपेक्षा अधिक रुपयांचा मुद्देमाल जप्त करण्यात आला.
हेही वाचा : “तुम्हाला बघून घेतो”, शिक्षा भोगणाऱ्या संशियत आरोपीकडून कारागृहाच्या अधीक्षकांना शिवीगाळ
मुसळे यांच्याविरूध्द अंबड पोलीस ठाण्यात गुन्हा दाखल करण्यात आला आहे. नागरिकांनी प्रतिबंधित अन्न पदार्थाची कुठे विक्री होत असल्यास १८००२२२३६५ या क्रमांकावर संपर्क साधावा, असे आवाहन अन्न व औषध प्रशासन विभागाच्या वतीने करण्यात आले.
