नाशिक: शेततळ्यात बुडून भावंडांचा मृत्यू

नाशिक: निफाड येथील नांदुर्डी रस्त्यावरील ढेपले वस्तीवर शेततळ्यात बुडून अल्पवयीन भावंडांचा मृत्यू झाला. हे दोघेही वैनतेय विद्यालयात शिकत होते. ढेपले वस्तीवर बुधवारी सकाळी साडेआठच्या सुमारास विहिरीवरील इलेक्ट्रिक मोटर सुरू करण्यासाठी गोपाळ ढेपले यांची प्रेम (१५) आणि प्रतीक (१३) ही दोन्ही मुले गेली होती. बराच वेळ होऊनही मुले का परत आली नाहीत, हे पाहण्यासाठी घरातील मंडळी विहिरीजवळ गेली. परिसरात बिबट्या फिरत असल्यामुळे त्यांच्यावर बिबट्याने हल्ला केला की काय, अशी शंका आल्याने जवळपास शोध घेतला असता शेजारील शेतकऱ्याच्या शेततळ्याजवळ एका मुलाचे कपडे त्यांना आढळून आले. सर्वांनी धावपळ करून शेततळ्यात बुडालेल्या दोन्ही मुलांना बाहेर काढले. शेततळे काठोकाठ भरलेले असल्यामुळे मुलांचा जीव वाचविण्याची संधी मिळू शकली नाही.