नाशिक : सिन्नर विधानसभा मतदारसंघात राष्ट्रवादीच्या दोन्ही गटांमध्ये लढत होणार हे निश्चित मानले जात असून अजित पवार गटाचे आमदार माणिक कोकाटे यांना शह देण्यासाठी शरद पवार गटाने उदय सांगळे यांना पक्षात प्रवेश देत उमेदवारी जाहीर केली आहे. सांगळे यांच्या प्रवेशामुळे ही लढत चुरशीची होणार आहे.
सिन्नरच्या उमेदवारीसाठी शरद पवार गटाचे जिल्हाध्यक्ष कोंडाजीमामा आव्हाड यांच्यासह काहीजण इच्छुक होते. लोकसभा निवडणुकीत नाशिकमधून महाविकास आघाडीचे उमेदवार राजाभाऊ वाजे यांनी सिन्नरमधून सर्वाधिक म्हणजे सुमारे सव्वा लाखाचे मताधिक्य घेतले होते. त्यामुळे महाविकास आघाडीसाठी ही जागा सुरक्षित मानली जात होती. लोकसभा निवडणुकीत सांगळेंनी वाजेंना सहकार्य केले होते. त्याची परतफेड विधानसभेतून केली जात असल्याचे मानले जाते. जितेंद्र आव्हाड यांनी सांगळेंना शरद पवार गटाकडे आणण्यासाठी नियोजन केले.
हेही वाचा…पहिल्या दिवशी नाशिक पूर्व, मालेगाव बाह्यमधून दोन अर्ज दाखल
मंगळवारी मुंबईत शरद पवार, प्रदेशाध्यक्ष जयंत पाटील, रोहित पवार आदींच्या उपस्थितीत उदय सांगळेंचा पक्षात प्रवेश झाला. सिन्नरमधून तेच पक्षाचे उमेदवार राहणार असल्यावर शिक्कामोर्तब झाले आहे. या उमेदवारीतून शरद पवार यांनी मराठा आणि ओबीसी मतांची मोट बांधण्याचे नियोजन केले आहे. सिन्नरमध्ये मराठा आणि वंजारी मतदारांची संख्या मोठी आहे. खासदार वाजे हे मराठा समाजाचे आहेत. त्यांच्या मदतीने हे समीकरण जुळवून आणण्याची तयारी करण्यात आली आहे. आपल्याला विश्वासात घेऊन उदय सांगळे यांचा पक्षप्रवेश झाल्याचे कोंडाजीमामा यांनी सांगितले. पक्षाने घेतलेला निर्णय मान्य असून कोणतीही नाराजी नसल्याचे त्यांनी नमूद केले.
हेही वाचा…छगन भुजबळ यांचा येवल्यातून उमेदवारी अर्ज
गणेश गिते यांची प्रतिक्षा कायम
सिन्नर विधानसभेसाठी उदय सांगळे यांना प्रवेश देत उमेदवारी जाहीर करणाऱ्या राष्ट्रवादीने (शरद पवार) नाशिक भाजपचे माजी स्थायी सभापती गणेश गिते यांना मंगळवारी सायंकाळपर्यंत प्रतिक्षेत ठेवले. नाशिक पूर्वमधून ते निवडणुकीसाठी इच्छुक आहेत. याआधी त्यांनी शरद पवार आणि जयंत पाटील यांची भेट घेऊन चर्चा केली होती. महाविकास आघाडीतील शहरातील जागांचा तिढा सुटलेला नाही. नाशिक पूर्वची जागा पक्षाला मिळाली तरी भाजपमधून आलेल्यांना उमेदवारी देऊ नये, अशी मागणी पक्षाच्या वर्तुळातून होत आहे. त्यामुळे गिते यांचा प्रवेश होईल की नाही, याबद्दल काही पदाधिकारी साशंकता दर्शवितात.
