जळगाव – जिल्ह्यात अवैध गौणखनिजाचा प्रश्न ऐरणीवर आला आहे. त्यासाठी जिल्हा प्रशासनाकडून प्रयत्न सुरू आहेत. आता अवैध गौणखनिज साठा, उत्खनन व वाहतुकीची माहिती नागरिकांकडून जिल्हा प्रशासनाला मिळाल्यास अधिक परिणामकारक कारवाई करणे शक्य होईल. जनतेचे अधिकाधिक सहकार्य मिळवून अवैध गौणखनिजाचा साठा, उत्खनन व वाहतुकीवर प्रतिबंध करण्याचा जिल्हा प्रशासनाचा मानस आहे, असे जिल्हाधिकारी अमन मित्तल यांनी सांगितले.
जिल्ह्यातील अवैध गौणखनिज उत्खनन, वाहतूक रोखण्यासाठी जिल्हास्तरीय विविध विभागांच्या समन्वयातून पथके नियुक्त करण्यात आली आहेत. आवश्यक उपाययोजना करून जिल्ह्यातील अवैध गौणखनिज उत्खनन व वाहतूक रोखण्यासाठी जिल्हा प्रशासनाकडून प्रयत्न करण्यात येत आहेत. सामान्य नागरिकांना अवैध गौणखनिज साठा, उत्खनन व वाहतुकीबाबत माहिती जिल्हा प्रशासनाला ९२०९२८४०१० या हेल्पलाइन क्रमांकावर जिल्हा प्रशासनाला माहिती देता येईल. नागरिकांनी या हेल्पलाईन क्रमांकावर अवैध गौणखनिज साठा, उत्खनन व वाहतुकीबाबत व्हॉटसअपद्वारे घटनेचे छायाचित्र, चलचित्रफीत, घटनेचे ठिकाण, गुगल लोकेशन कळविल्यास प्राप्त तक्रारीबाबत जिल्हा प्रशासनाच्या स्तरावरून तत्काळ कारवाई करण्यात येणार आहे. अवैध गौणखनिजाबाबत तक्रार करणार्या नागरिकांचे नाव गोपनीय ठेवण्यात येईल. नागरिकांनी जिल्हा प्रशासनाच्या उपक्रमाला सहकार्य करण्याचे आवाहन जिल्हाधिकारी तथा जिल्हा दंडाधिकारी मित्तल यांनी केले आहे.
