नाशिक – किर्लोस्कर ग्रुपच्या वतीने आयोजित १३ वा किर्लोस्कर वसुंधरा चित्रपट महोत्सव सोमवारपासून येथील गुरू गोविंदसिंग तंत्रनिकेतन महाविद्यालयात भरविण्यात येणार आहे. सोमवारी सकाळी ११ वाजता प्राचार्य श्रीहरी उपासनी यांच्या हस्ते महोत्सवाचे उद्घाटन होणार आहे.
भारताच्या पुढाकाराने संयुक्त राष्ट्रांनी २०२३ हे वर्ष आंतरराष्ट्रीय भरडधान्य वर्ष म्हणून घोषित केले आहे. किर्लोस्कर वसुंधरा महोत्सव हा, या विषयावर लक्ष केंद्रित करणारा भारतातील पहिला महोत्सव असेल. यंदा महोत्सव सकस अन्न, समृद्ध निसर्ग आणि आरोग्यपूर्ण समाज या विषयावर होणार आहे. यावेळी किर्लोस्कर वसुंधरा महोत्सवाचे अध्यक्ष आर. आर. देशपांडे, संयोजक वीरेंद्र चित्राव, किर्लोस्कर ऑईल नाशिकचे केंद्रप्रमुख परेश जोशी, व्यवस्थापक राहुल बोरसे यांची उपस्थिती राहील. डॉ. मंदार दातार (पुणे) यांना ’किर्लोस्कर वसुंधरा सन्मान’, प्रा. डॉ. संजय औटी (नाशिक) यांना ’वसुंधरा मित्र – हरित शिक्षक’ तर बसवंत हनी बी पार्क (पिंपळगाव बसवंत) यांना ’वसुंधरा मित्र संस्था’ असे पुरस्कार वितरण केले जाणार आहे. महोत्सवात पर्यावरण विषयक माहितीपट दाखविण्यात येणार आहेत. महोत्सवात एंचँटिंग इंडिया’ या विषयावर छायाचित्र प्रदर्शन भरविण्यात येणार आहे. नाशिककरांनी महोत्सवास भेट द्यावी असे आवाहन आयोजकांनी केले आहे. शहर परिसरातील अन्य महाविद्यालयांमध्ये महोत्सवाच्या अनुषंगाने व्याख्याने होणार आहेत.
